Mittarfinnik ingerlatseqatigiiffimmi pisortaaneq nutaaq

Mittarfinnik ingerlatseqatigiiffimmi Mittarfeqarfinni Henrik Estrup pisortaanertut Naalakkersuisut toqqarpaat, taanna juunip aallaqqaataani sulilissaaq.

Henrik Estrup mittarfinnik ingerlatseqatigiiffimmi aqutsineq tiguaa, tamanna ukiuni aggersuni mittarfiit nutaat sananeqarneranni allanngorfiusussaavoq.

Henrik Estrupip atorfik Marie Fleischerimit kingoraarpaa, taanna marsimi tassanngaannaq ”illuatungeriit isumaqatigiissuteqarnerisigut” suliffeqarfik ukiut marluk suliffigereerlugu qimappaa.

Pisortaaninngortoq CV-mini inuussutissarsiornikkut misilittagartuujuvoq, kingullermik Arssarnerini pisortatut, taanna nunatsinni suliffeqarfiit sarfat aqqutaannik ikkussuisartut annersaraat. Aammattaaq siornatigut Nuuk Imeq A/S-imi, Great Greenland A/S-imi aamma Nukissiorfinni pisortaanikuuvoq.

Ineqarnermut Attaveqaqatigiinnermullu Naalakkersuisoq Karl Frederik Danielsen oqarpoq:

- Naalakkersuisut Henrik Estrup Mittarfeqarfinni pisortaanertut atorfimmik neqeroorfiginiarlugu aalajangersimammata nuannaarutigisorujussuuara. Henrik Estrup pisortatut pikkorissuuvoq tunniusimasuullunilu, pisortatut sulineq misilittagaqarfigilluarlugu. Henrik Estrupip suleqatigillualernissaanut qilanaarpunga.

Henrik Estrup tusagassiuutinut nalunaarummi tassani ima oqarpoq:

- Mittarfeqarfiit Kalaallit Nunaanni suliffeqarfiit annersaasa ilagaat, Kalaallit Nunaanni angallannermut attaveqaqatigiinnermut tamanut annertuumik sunniuteqartoq. Siusinnerusukkut kalaallit suliffeqarfiinik angisuunik arlalinnik aqutsisuusarsimavunga, aammalu Mittarfeqarfinni sulisorpassuit pikkorissut, piginnaanillit tunniusimasullu suleqatigilernissaannut qilanaarpunga. Aamma suliffeqarfimmut piumasaqaatit ataatsimut isigalugit annertusinerisa, Kalaallit Nunaannilu mittarfiit nutaat sanaartorneqarnerisa kingunerisaannik suliffeqarfimmi allannguutissanut pisariaqartunut akuunissara qilanaaraara.

Powered by Labrador CMS