Mittarfinnik ingerlatseqatigiiffik milliardit sisamararterutaannik aningaasaliiffigineqaqqissasoq

Kalaallit Airportsip immikkut ittumik ataatsimeersuarnerani Namminersorlutik Oqartussat 252 millioner koruuninik aningaasaliissuteqassapput.

Mittarfiliornerit Kalaallit Airports Holdingip Nuummi, Ilulissani Qaqortumilu nutaanik timmisartoqarfiliornissamik suliassaqartup pingasunngornermi immikkut ittumik ataatsimeersuarnerani aningaasaliiffigineqaqqissapput.

Ataatsimeersuarnermi oqaluuserisassatuaavoq ingerlatseqatigiiffimmut 252 millioner koruuninik aningaasaliissuteqarnissaq.

Naalakkersuisut Siulittaasuata Naalakkersuisoqarfianit ataatsimeersuarnermi oqaluuserisassaq saqqummiunneqarsimavoq, tassanilu takuneqarsinnaavoq ingerlatseqatigiiffiup aktiaataasa nalingi 1.378.439.000 koruuniniit 1.630.439.000 koruuninut qaffanneqarniartut. Tamanna aktianik nutaanik 252.000-inik, aktia ataaseq 1.000 koruuninik nalilik, pisortatigoortumik pisiaqarnikkut pissaaq.

Aningaasat Air Greenlandimeersut

Naalakkersuisut Siulittaasuata Naalakkersuisoqarfianeersup Siulersuisut allattoqarfiata Sermitsiaq.AG-mut ilisimatitsissutigaa, 252 millioner koruunit pineqartut ilaat 65 millioner koruunit, Qaqortumi Timmisartoqarfissap sananeqarnissaa naatsorsuutigisamit akisunerusussaammat, Kalaallit Airports Holding A/Sip nammineq aningaasaatissaatut tunniunneqarnissaat politikkerinit aalajangiiffigineqarsimasoq.

Aningaasat ilaat aamma Piffissaq ungasinnerusoq eqqarsaatigalugu aningaasaliissuteqarnissamut Aningaasaateqarfimmit, Tusass A/sip immikkut ittumik iluanaarutaanit kiisalu Namminersorlutik Oqartusat aktiaatileqatigiiffiutaasa iluanaarutaasa ilaannit pissarsiarineqassapput.

Aningaasat Air Greenlandimit aaneqarsimapput, Air Greenland coronap nunarsuarmi tuniluunnerata malitsigisaanik oqartussat akuersiteqqaarlugit angallassisarnerup amigartooruteqarfiunera matussuserniarlugu 65 millioner koruuninik siusinnerusukkut aningaasaliiffigineqarsimaneranit. Aningaasat taakku Air Greenlandip atorniarunnaarsimavai.

Katillugit 2,5 milliarder koruuninik aningaasaliiffigineqassasoq

Naalakkersuisut aningaasaliissuteqarnermikkut Namminersorlutik Oqartussat timmisartoqarfiliornernut pilersaarutaasumik aningaasaliissuteqarnissaat qulakkeeriffiginiarlugu annertuumik alloriartippaat.

Namminersorlutik Oqartussat 2,1 milliarder koruuninik aningaasaliissuteqarnissamik pilersaaruteqarsimapput. Taamaammat 2022-mut Aningaasanut inatsimmi aningaasaliissutiginiakkat 400 millioner koruuninik ilaneqarsimapput, Qaqortumi Timmisartoqarfissaq naatsorsuutigisamit akisunerusussaammat.

1.639 millioner koruuninik nammineq aningaasaateqalernikkut aamma Namminersorlutik Oqartussanit 94,3 millioner koruuninik taarsigassarsisimanerup malitsigisaanik 800 millioner koruunit missaanniittut amigaatigineqalerput.

Immikkut ittumik ataatsimeersuarneq najuunnani atortorissaarutit aqqutigalugit pingasunngorpat ualikkut pingasunut ingerlanneqassaaq, Naalakkersuisut Siulittaasuata Naalakkersuisoqarfianit ilisimatitsissutigineqarpoq.

Powered by Labrador CMS