mittarfiit
Mittarfimmi pisortaq misilittagartooq tunuarpoq
Narsarsuarmi mittarfik pisortassarsiortariaqarpoq.
Storch Lund 1. novemberimiit atorfimminiit tunuassalluni aalajangerpoq, Tupaarnaq Kreutzmann Kleistilu, ullumikku mittarfimmi aqutsisuutsoq mittarfimmi pisortanngortinneqarallarpoq.
Narsarsuarmi mittarfiup pisortaatut atorfit maleruagassat malillugit inuttassarsiuunneqassaaq.
Tupaarnaq 1. juni 2017-miik mittarfimmi aqutsisuunikuuvoq. Narsarsuarmi mittarfiup pisortaangallarnermi nalaani Kujataani qulimiguulinnut mittarfiit Nanortalimmiittoq, Narsamiittoq Qaqortumiittorlu akissussaaffigissavai, tusagassiuutinut nalunaarummi paasissutissiarineqarpoq.
Taanna 31-iinnarnik ukioqaraluarluni Grønlands Elitesportimi Kalaallit Nunaanilu Timersortartut Kattufiani atorfeqartarsimavoq. Taakkua saniatigut timersornermi angusaqarluartarsimavoq, ilaatigut kalaallini kisiartaalluni sangusaartartuni OL-imut peqataanikuuvoq Sloveniamilu inuusuttut sangusaarnerini bronzennassimalluni. Tupaarnap inooqatini Narsarsuup avatinnguani savaataatilik najorpaa.
Ukiuni 25-ni nalliuttorsiorneq
Storch Lund suliffeqarfimmi ukiorpassuarni sulisimanini qujassuteqarfigaa, suliffeqarfik ukiuni arlalinni taassuminnga sinaakkusersorneqarsimavoq. Taanna massakkut 61-nik ukioqarpoq suliniutinillu allanik misiliinissani kissaatigaa.
Storc Lund 1970-kkut aallartinnerini nunatsinni mittarfinni sulinini aallartissimavaa. Ukiullu pingasut matuma siorna Narsarsuup mittarfiani sulisimanini ukiuni 25-ni nalliuttorsiuutigaa suliffeqarfimmilu ukiut 40-t nalliuttorsiutigalugu. Taassuma Mittarfinnut sunniuteqarsimanera annikigisassaanngilaq, ingerlatseqatigiiffik tusagassiuutinut nalunaarummi allappoq.