Mittarfiliortut annertuumik piumasaqalersut
Sivitsortumik tusatsiakkat naapertorlugit Munck Gruppen saniatigut piumasaqarniarpoq, mittarfiliornermi milliardinik isumaqatigiissutaasut saniatigut akiligassarujussuanngorsinnaasumik. Munck Gruppen sanaartortitsisorluunniit suliaq pillugu uppernarsaateqarnianngillat.
Danmarkimit entreprenørit Munck Gruppen A/S pilersaaruteqarpoq sanaartortitsisunut Kalaallit Airportsimut (KAIR) annertuumik piumasaqarnissaminut, mittarfiliornermik ingerlatseqatigiiffimmut millioninik pingasunik kisitsisitalimmik akeqarsinnaasumik.
Aviisi Sermitsiaq taama allappoq.
Sapaatit akunnerini kingullerni ilaatigut Atlantikup avannaani inuussutissarsiuteqartut nuimasut, ilaatigut sanaartornermik entreprenørillu ingerlatsiviini tusatsiakkat sivitsortumik ingerlaarsimapput. Pineqarpoq Namminersorlutik Oqartussat naalagaaffiullu mittarfiliornissamik suliffeqarfiutaat ungasingitsukkut Munckimit milliardinik isumaqatigiissutip Munckip KAIR-imik isumaqatigiissutaata saniatigut 800 million koruuninik akiligassiinissamik piumaffigineqarniartoq.
Tusagaqarfiit arlaqartut assigiimmik Sermitsiamut oqarput, aningaasat taaneqartut 800 million koruunit missaanniittut.
– Munckimiit pisortatiguunngitsumik Kalaallit Airportsit ilimasaarneqarsimavoq, aningaasartuutit siumut ilisimaneqanngitsut peqqutigalugit 800 million koruuninik piumasaqaateqassasoq. Tamatumani Munckip tatineqarnera peqqutaavoq. Entreprenøri sanaartornermini kinguaattoorpoq. Ilaatigut coronamik inissisimaneq peqqutigalugu sulisut mattunneqarsimapput sanaartornernullu pilersuinissamik ajornartorsiuteqarsimalluni.
Paasisaqarfiup Kalaallit Nunaanni annertuunik sanaartornernik suliaqarnermik KAIR-ip siuttuuffigisaanik ilisimasaqarluartup tamanna oqaatigaa.
Munck Gruppenimi pisortaanerup piginnittullu Hans Christian Munckip suliaq oqaaseqarfiginianngilaa.
Aviisimi Sermitsiami atuarnerusinnaavutit, aviisi uani pissarsiariuk: