mittarfiit
Mittarfiliornissat akisunerujussuusinnaapput
Kalaallit Airports mittarfiliornissanut Namminersorlutik Oqartussanut aningaasaliisartunulluunniit aningaasanik amerlanerusunik piumasaqaratarsinnaapput.
Sapaatip-akunnerata aallartilaarnerani Kalaallit Airportsip pisortaanerata, Steffen Ulrich-Lyngep paasissutissiaraa Danske Bankip Ilulissani, Qaqortumi Nuummilu mittarfiit pingasut sanaartorneqarnissaannut ingerlatseqatigiiffimmut aningaasaliisussanik ujaasitinneqartussatut toqqarneqartoq.
1,6-1,8 milliard koruunit nassaarineqarlik
Siullermik Danske Bankimut aningaasat 1,6 - 1,8 milliard koruuninik nassaarniarnissaa suliakkiunneqarsimavoq, tassa sanaartornermut aningaasat 3,6 milliard koruuninik naleqartup 45-50 procentia. Sinneruttullu 1,8 - 2 milliard koruunillu missaanniittut Namminersorlutik Oqartussat suliniummut aningaasaliissutigineqassapput.
- Namminersorlutik Oqartussat tusagassiuutinut nalunaarut akuersissutigaat, tassani Namminersorluk Oqartussat sanaartornermut aningaasartuutigineqartut 50 - 55 procentit missaanni aningaasaliissuteqassasut allassimavoq, Steffen Ulrich-Lynge paasissutissiivoq.
Aningaasat atorneqartut nalimmassarneqarsinnaasut
Taanna nassuiaavoq aningaasat Danske Bankip nassaariniangassai nalimmassarneqarsinnaasut.
- Danske Banip atorniartarfinni nassaariniangassai allanngortinnissaanut periarfissaqarpugut, pisortaaneq qaammatip tulliani suliniutip erseqqinnerusumik qanoq akeqassaneranik ilisimasaqalertussaq oqarpoq.
Aamma atuaruk:
Aningaasaliissutigineqartussat 3,6 milliard koruuninik akeqarnissaa nalilerneqarsimavoq, naliliinerlu missingersuutaannaangallarmat aningaasat amerlanaarneqarsimanngikkunik ikinaarneqarsimasinnaapput.
Qaammatip tulliani ersarinnerussasoq
- Aningaasat ilumoornersut qaammatip tulliani ersarinnerusumik ilisimasaqarfigilissavarput. Ilulissanimi mittarfiliornissaq qanoq akeqassanera Cowi'p ersarinnerusumik eqqoriartussaavaa, Steffen Ulrich-Lynge nassuiaavoq.
2018-mullu aningaasanut inatsisissatut siunnersuummi isumaqatiginninniarnermi politikkerit nuanut allanut atorniarneqartussat sanilliunnerini suliuniummut qanoq aningaasaleerusutsiginerat aamma tikkuussisussaavoq.