Skip to main content

Mittarfiliornissanut atatillugu Lars Løkke millionilikkaanik

Statsministeri Lars Løkke Rasmussen Kim Kielsenimik isumaqatiginninniariartorluni Kalaallit Nunaannukassaaq ataasinngorpat. Nunatsinni mittarfiliornissanut atatillugu Naalagaaffiup aningaasaliissuteqarnissaa isumaqatiginninniutaassaaq

Naalagaaffiup mittarfiliornissanut aningaasaleeqataanissaa anguniarlugu Lars Løkke Rasmussen Nuummukassaaq ataasinngorpat.

Nuummiinnermini Naalakkersuisunut siulittaasoq Kim Kielsen isumaqatiginninniarfigissavaa.

Naalagaaffiup mittarfilionissanut millionilikkaanik aningaasaliinissaa ilaatigut isumaqatiginninniarfigineqassaaq.

Suut najoqqutaralugit Kalaallit Airportsimut aningaasaliisoqassanersoq oqaluuserineqassaaq.

Kalaallit Airportsip Nuummi Ilulissanilu mittarfiit tallineqarnissaannut Qaqortumilu mittarfiliortoqarnissaanut 3,5 milliard koruuninik aningaasartuuteqarnissaa naatsorsuutigineqarpoq.

Naalagaaffiup piginneqataanissaa
Sermitsiaq.AG-ip paasissutissai naapertorlugit Kalaallit Nunaannit neriuutigineqarpoq Naalagaaffiup millionilikkaanik Kalaallit Airportsimut aningaasaliinissaa. Taamaasilluni Naalagaaffik Kalaallit Airportsimut piginneqataalissaaq.

Suleqatigiissitamik pilersitsisoqarpoq aasaq, tassani kalaallit danskillu atorfillit 30-it ilaasortanngortinneqarput.

Suleqatigiissitami Kim Kielsenip Naalakkersuisoqarfiani pisortaq Søren Hald Møller siuttutut inissisimavoq.

Naalagaaffiup aningaasaliinissaata siunnersuutigineqarnissaa sulissutigineqarpoq.

Taamaasilluni Danmarkimit bloktilskudip saniatigut aningaasaliisoqarsinnaanissaa siullerpaamik pisinnaanngussaaq, oqaluttuarisaanermilu tamanna siullerpaamik pissalluni.

Kalaallit Airportsimut aningaasanik attartortitsinikkut aningaasaliinikkullu Namminersorlutik Oqartussanit pilersaarutigineqarnikuuvoq, taakkulu saniatigut Kalaallit Airportsip nunani allani aningaasaateqarfinnut 1,5 milliard koruuninik attartornissaa aamma pilersaarutaasimalluni.

Pingaarutilimmik sunniuteqarneq
Naalagaaffimmit aningaasaliisoqassappat Namminersorlutik Oqartussanit akisussaaffik suli paarineqassaaq. Naalagaaffimmit aningaasaliisoqassappat Kalaallit Airportsimut aamma aningaasanik amerlanerusunik atukkiisoqarsinnaalissaaq.

Aamma Kalaallit Airportsip nunanut allanut aningaasanut 1,5 milliardtinik atornissaa millisinnaalissaaq.

Lars Løkke Rasmussenip Kim Kielsenillu ataatsimiinnerat aasaq Danmarkimi ataatsimiinnerannit nanginneruvoq. Tassani mittarfiliornissamut atatillugu Naalagaaffiup aningaasaliissuteqarnissaa eqqartorneqarpoq.

Mittarfiliornissanut inatsit
Mittarfiliornissamut inatsisissap suliarineqarnera aaqqiagiinngissutigineqarpoq maanna.

Kim Kielsenip Naalakkersuisunut siulittaasunngoqqinneranit qaammatit sisamat ingerlariiginnartut Naalakkersuisooqatigiinni ajornartorsiortoqarpoq. Tassami Partii Naleqqami ilaasortap Jens Napaattuup Naalakkersuisut mittarfiliornissamut pilersaarutaat akerlerilluinnarpaa.

Nuummi Ilulissanilu mittarfiit 2.200 meterinut tallineqarnissaat Partii Naleqqamit isornartorsiorneqarpoq, 1.199 meterinut tallineqarnissaat periarfissaanersoq ujartornikuullugu. Tassami Nuummi Qaqortumilu mittarfeqarnissaq akisuallaassasoq isumaqarfigineqarpoq.

Naalakkersuisooqatigiinni suliaq pillugu isumaqatigiinngittoqarpoq. Inatsisartut ukiaanerani ataatsimiinneranni Naalakkersuisooqatigiinnit siunnersuutigineqartoq oqaluuserineqassaaq.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER