Mittarfiliornissamut isumaqatigiissummi nalorninartorpassuit

Naalagaaffiup aningaasaliinissaa Lars Løkke Rasmussenimit qulakkerneqarpoq. Kisianni suut isumaqatigiissummi piumasaqaataassanersut erseqqissumik takutinneqanngillat

Statsministeri Lars Løkke Rasmussen aamma Naalakkersuisunut siulittaasoq Kim Kielsen Hans Egedep Illuani Nuummi ataasinngormat atsioqatigiipput.

Aningaasat amerlanerpaartaat sumut atorneqassanersut erseqqippoq. Kisianni piumasaqaatit soorlu taarsigassarsiat qanoq utertinneqassanersut erseqqissumik takutinneqanngillat.

Piumasaqaatit erseqqinnginneri pissutaallutik illuatungiliuttunit isumaqatigiissut suli isummerfigineqarumanngilaq.

Tassami tallimariarluni isumaqatigiissummi allaqqasoqarpoq 'Isumaqatigiissummut atatillugu pissutsit isumaqatigiissutigineqassapput'.

Kalaallit Airportsimut 700 million koruunit aningaasaliiffigineqarnissaannut atatillugu oqaaseqaat:

"Piginnittuuneq pillugu isumaqatigiissummut atatillugu pissutsit allat Naalakkersuisut Siulittaasuata finansministerillu akornanni isumaqatigiissutigineqassapput."

Kalaallit Airportsip 450 million koruunit tungaanut Den Nordiske Investeringsbankimit taarsigassarsinissaanut tunngatillugu:

"Taarsigasseeqqinnermut atatillugu pissutsit allat, matumani allanngortitsisinnaatitaaneq (konverteringsretten) ilanngullugu, Kalaallit Airports A/S-ip Nuummi Ilulissanilu mittarfinnik sanaartornissamut ingerlatsinissamullu ingerlatseqatigiiffiutaanit, finansministerimit kiisalu Aningaasaqarnermut Naalakkersuisumit isumaqatigiissutigineqassapput"

Naalagaaffimmit Greenland Venturemut Vækstfondenimullu 198 million koruuninik aningaasaliinissaq pillugu:

"Namminersorlutik Oqartussat naalagaaffiullu aningaasaliissutai inuussutissarsiornermullu pujlep pilersinneranut pillugit pissutsit allat Inuussutissarsiornermut Nukissiuteqarnermullu Naalakkersuisup erhvervsministerillu isumaqatigiissutigissavaat."

Naalagaaffiup Air Greenlandip piginnittuunermik tunniussinermut atatillugu:

"Piginnittuuneq pillugu isumaqatigiissummut atatillugu pissutsit allat Naalakkersuisut Siulittaasuata finansministerillu akornanni isumaqatigiissutigineqassapput."

Aamma isumaqatigiissut atsiorneqartoq Inatsisartunit kiisalu Folketingimit akuerineqaqqaartussaavoq.

Powered by Labrador CMS