Mittarfiliornermut atortussat Nuummut tikittut
Sanaartornermik suliffeqarfik Munck qammammi matumani mittarfiliorluni aallartissaaq
Maskiinarsuit sanaartornermi atortut mittarfissap sananeqarneranut atorneqartussat Nuummut tikipput.
Umiarsuaq assartuut BBC Lagos kinguaattuulaarsimaallluni ippassaq Nuummut nal. 17.30 missiliuleraa tikippoq.
Sanaartornermik ingerlatsisoq Munck Gruppen mittarfissaq sanaartorlugu qaammatip matuma naalernerani aallartissasoq ilimagineqarpoq.
Umiarsuaq maskiinarsuarnik sanaartornermi atorneqartartunik usilersorsimalluni Fynimi Nyborgip umiarsualivianit ataasinngornermi septembarip 23-ani aallarpoq.
Atortussanik Munckillu Nuummi sulisuisa ineqarfissaannut atortussanik katitigassanik Islandimi Húsavikimi Hafnafjordurimilu usilersorneqaqqippoq.
Munckip sulisui Nuummi mittarfitoqqap eqqaani tammaarsimaffiliami najugaqassapput, tassanilu aamma allaffiit maskiinarsuillu sanaartornermut atortut inissisimassallutik.
Sanaartornermik ingerlatseqatigiiffiup agguaqatigiissillugu 100-t missaanniittunik piffissallu ingerlanerani ilaatigut 200-t angullugit amerlassusilinnik sulisoqartarnissani naatsorsuutigaa. Umiarsuaq asssartuut tulleq qillerinermut atortunik atortussanillu suli allanik usilluni novembarimi decembarimiluunniit Nuummut tikissaaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...