Mittarfiliornerit peqqinnissaqarfik artukkissavaa
Mittarfinnik sanaartornerit annertussangaarmata, Peqqinnissaqarfimmut saniatigut ''annikinngitsunik'' aningaasartuuteqartitsissaaq.
Attaveqaqatigiinnermut naalakkersuisoq Simon Simonsen, mittarfiliortiternissamut pilersaarummut allannguutissatut siunnersuummik saqqummiussivoq, tassani peqqinnissaqarfik aninigaasaqarnermut inatsit aqqutigalugu saniatigut aningaasaliiffigeqqinneqartariaqartoq saqqummiunneqarpoq.
Malitseqartussaq
- Suliassaq mittarfiliassatut ittoq taama annertutigisoq annertoorujussuusorlu soorunami peqqinnissaqarfimmut sunniisussaavoq aammalu peqqinnissaqarfimmi allani malittaasumik sunniuteqanngitsumik aningaasaliissutit pioreersut iluanniitinneqarsinnaanngitsunik annikinngitsunik tamatumunnga naleqqiullugu aningaasartuuteqarnerulernermik malitseqartussaalluni, allannguutissatut siunnersuummi tamanna allaqqavoq.
- Naatsorsuutigineqarpoq aningaasartuutaanerulersut siunissami aningaasanut inatsisitigut aningaasaliissuteqarnerni suleriaatsit atorneqartartut atorlugit matussuserneqassasut, taama allaqqavoq.
Sulisut sillimmaserneqassapput
Tassani aamma atuarneqarsinnaavoq, sulisitsisut nunanit allaneersunik illuliornermi sanaartornermilu sulisoqartut, Kalaallit Nunaanni peqqinnissaqarfiup illuliornermi sanaartornermilu sulisunik napparsimasunik ajoqusersimasunillu, peqqinnissaqarfiup sullississutai pillugit inatsit sukkulluunniit atuuttoq malillugu akeqanngitsumik sullinneqarnissamut pisinnaatitaaffeqartut aallarussinermut, assartuussinermut katsorsaanermullu aningaasartuutaannik matussutissamik, sillimmasiinissamut isumaqatigiissummi pisussaaffilerneqarnissaat Kalaallit Airports A/S-ip qulakkiissallugu.
Suliamit suliamut naliliineq
Oqaaseqaatini aamma atuarneqarsinnaavoq, suliat ataasiakkaarlugit peqqinnissaqarfimmit sullissineq akeqanngitsuunersoq imaluunniit akiliinertaqassanersoq nalilersorneqartassasoq-
- Sulitilluni annertunerusumik ajutoortoqartillugu, aallarussinissamik, assartuussinissamik katsorsaanissamillu neqerooruteqartoqarsinnaanersoq, Kalaallit Nunaanni peqqinnissaqarfimmi pisuni ataasiakkaani pisinnaasaqarneq apeqqutaassaaq.
Mittarfiliortiternissamut pilersaarutinut allannguutit oktobarip 15-anni aappassaaneerneqassapput. Peqqinnissaqarfimmi sanatigut aningaasartuutissat mittarfinnik sanaartornermut ataatillugu qanoq amerlatigissanersut allaqqanngilaq.