Mittarfiliaq ajasoornartoq
Nuummi mittarfittaassaq, Nunatsinni sakkutuujunngitsut sanaartugaasa annersaat, sanaartorlugu aallarteruttorneqarpoq.
Sanaartortitsisut Kalaallit Airportsimeersut illoqarfiit pingaarnersaanni innuttaasut suliffeqarfimmut angisuumut tassunga sapaatiummat akuniaatippai, tamaanilu innuttaasunut coronamit atugarliortitaasunut imminut ungasinniarnissamut inissaqarluarluni.
Aviisi Sermitsiaq taama allappoq.
Munck Gruppenip sanaartugaata ajasoornartup sumut killissimaneranik takuniaasut kisinneqanngillat, ilimagineqarlunili 1000-it 1200-llu akornanniittut takuniaasimassasut. Taakku amerlassusaat siullermik takuniaasitsinermit marloriaammik amerlanerupput.
Kalaallit Airportsip illorsuaatini siulleq ammaqqammerpaa, taanna atortunut toqqorsivittut atorneqassaaq, soorlu aputaajaatinut, maskiinanut sermiiaatinut, assartuutinut nassiussanik nassatanillu assartuinernut atorneqartartussanut aamma bussit ilaasunik allanillu mittarfimmi atorfissaqartinneqartunut aallariartortarfimmit timmisartumut angallassisartussanut inissiivissatut. Ungasinnerusumi illorsuarmik sullissivissamik piareersaasoqarpoq, taanna atortunut allanut ikuallattoqarneranilu qatserutinut kiisalu avannamut isuani tikittarfittut kujammullu isuani aallariartortarfittut atorneqassalluni aamma saava’tungaani timmisartunut arlalinnut inissaqarluni, tassa timmisartunut imarpik qulaallugu timmisartuussisartunut aamma timmisartunut minnerusunut sinerissami timmisartuussisartunut. Illuatungaanilu biilinut bussinullu uninngasarfeqarluni tassa ilaasut aallariartortarfimmukartut atugassaannik, tamatumani inissaqassalluni ilaasunut 800-nut, tassa timmisartunut ilaasussanut 400-nut aamma timmisartunit tikittunut 400-nut.
Taanna tikitsinnagu saneqqunneqartarluni Munck Gruppenip sulisuminut najugaqarfiutai inissiat containeriusut sulisorpassuarnit 150-it missaanniittunit najugarineqartut.
Soqutiginnittut ilanngullugu mittarfiup kujaterpiaanukariarlutik namminneerlutik takusinnaavaat mittarfiup silissusia aamma isumannaallisaaffik ilaalu ilanngullugit. Meeqqat takuniaanermi peqataasut biilersuarnut sanaartornermi atorneqartunut ikinissartik soqutiginartinneruaat aquttarfiinullu ingeriarlutik mittarfiliornissamik takorluuillutik.
Aviisimi Sermitsiami atuarnerusinnaavutit. Aviisi uani pissarsiariuk: