Mittarfik: Piffissani aalajangersimasuni qaartiterisoqartassaaq
Nuummi mittarfiup allilerneqarnerani sanaartortoqalerpat ullut tamaasa piffissaq apeqqutaatinnagu qaartiterisoqartassanngilaq, tamanna Nuummiut nuannaarutigisinnaavaat. Sapaatikkulli ullaakkut qaartiterisunit itertitaasarsinnaanissaq sillimaffigineqartariaqarpoq.
Suleqatigiissitaq Mittarfeqarfinnit, Air Greenlandimit, Air Icelandimit aamma Kalaallit Airportsimit peqataaffigineqartoq aalajangerpoq mittarfiup allilerneqarnissaanut sanaartornermi pingasunngornermi sapaammilu ullaakkut taamaallaat qaartiterisoqartassasoq.
- Paasivarput qaartiterinerit sapaatip akunneranut ulluni marluinnarni pisinnaanissaat ajornavianngitsoq, taamaasillutik ulluinnarni timmisartuussinernut akornutaassanatik, Kalaallit Airportsimi pisortaq, Peter Wistoft, Sermitsiaq.AG-mut ilisimatitsivoq.
Akunnerni marlunni sapaatip akunneranut marloriarlutik
Mittarfeqarfinni sanaartornermut pisortaq, Martin Møller ilisimatitsivoq akunnerni marlunni qaartiterisoqartarsinnaasoq.
- Aasaanerani nalunaaqutaq 07.00-miit 09.00-mut qaartiterisoqartassaaq, ukiuuneranilu nalunaaqutaq 10.00-miit 12.00-mut qaartiterisoqartassalluni, Martin Møller ilisimatitsivoq. Piffissat assigiinnginnerannut pissutaavoq qaartartunik suliaqarnermi silap qaammarsimanissaa pisariaqarmat.
Qaartiterineq akunnerni marlunni ataannartumik tusaaneqartarnissaa naatsorsuutigineqassanngilaq. Qaartitsereernerummi kingorna mittarfimmi sulisut mittarfiup aqqutaani timmisartunut mittussanut akornutaasinnaasunik qaartitamerngeqarnerannik nakkutilleeqqaartarnissaanut piffissaliisoqarsimavoq.
Annertungaatsiartut
Qaqqaq annertungaatsiartoq qaartiterlugu sequtserneqartussaavoq. Annertussuseq arsaattarfimmut, kilumiiterip aappaa avillugu qummut portussuseqartumut assersuunneqarsinnaavoq.
Sanaartornermi qaartiterutit 3.200 tonsit qaartiterutillu dynamittit 380 tonsit atorneqassasut naatsorsorneqarsimavoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...