Mittarfik nutaaq: Qanittuani najugaqartut taarsiifigineqarumapput

Nuummi mittarfiup tallilerneqarnerani akornutaasussat ima annertutigaat allaat qanittuani najugaqartut taarsiiffigitinnissaat inissaminiittariaqarsorinarluni. ASN pillugu tusarniaanermut taama akissuteqartoqarpoq.

Mittarfiup ungasinngisaani Nuussuarmi najugaqartup, Andor Thomsenip, Nuummi mittarfiup tallilerneqarnerani qanittuani najugaqartunut akornutissat pillugit taarsiisinnaanermut maleruagassaqartoqarnissaa, ASN pillugu tusarniaanermi ujartorpaa.

- Inissaminiilluinarpoq sanaartugassap taama angitigisup taamalu sivisutigisumik suliarineqartussap qanittuani najugalinnut akornutaanngitsoornissaa, aammali inissaminiittariaqarpoq qanittuani najugaqartut akornusersorneqarnissaat pillugu taarsiiffigineqarnissamut maleruagassanik pilersitsinissaq. Pineqartut pinngitsooratik taarsiiffigineqarnissaq pillugu immikkut piumasaqarsinnaasut, kisianni inissaminiinnerussaaq inatsimmi nutaami taarsiiffigitinnissaq pillugu maleriuagassaliortoqarpat, Andor Thomsen tusarniaanermi akissuteqarluni allappoq. Tusarniaanermi akissutit Sermitsiaq.AG-p allagaatinik takunnissinnaanermut qinnuteqarnermini pissarsiarai.

Nunap iluatigut qimuttuitsut aqqutaannik sanaartortoqarneq

Taassuma Københavnimi nunap iluatigut qimuttuitsut aqqutaannik sanaartortoqarmat periuseq atorneqartoq eqqaavaa, tassa taarsiiffigineqarnissaq pillugu maleruagassat inatsimmi allassimareersimammata.

- Maleruagassat (nunap iluatigut qimuttuitsut aqqutaanni sanaartornermi, aaqq.) malillugit najugaqartut sanaartornermit eqqorneqartut immikkut piumasaqaateqanngikkaluarlutik taarsiiffigineqarsinnaapput. Nunap iluatigut qimuttuitsuutileqatigiiffiup nittartakkamini taarsiiffigitinnissaq pillugu periarfissat saqqummiuttassavai, najugaqartullu toqqaannartumik ilisimatinneqartassallutik. Taarsiiffigitissinnaanerup saniatigut allamut nuutsitaagallarsinnaanermik inillu tigusariaqalersinnaaneranik periarfissaqartoqarpoq. Mittarfiit pillugit inatsimmi akornusersorneqarneq pillugu taarsiiffigitissinnaaneq eqqaaneqanngilaq, inatsisiliortut timmisartoqarfiutillillu tamakkuninnga isummersuuteqarsimanngillat, Nuummi innuttaasoq Qattaami najugaqartoq akissummini allappoq.

Pujoralak, nipit takusassallu akornutaasussat

Andor Thomsenip nipit pujoralaallu akornutaasussat ASN-imi taaneqartut ilanngullugit eqqaavai. Taakku saniatigut inissiat mittarfimmut qanittut isikkiviisa allanngornissaat, tamassumalu inissiat akiisa apparsinnaanerat eqqaallugu.

- Najugaqartut pineqartut eqqartuussivikkoorullugu piumasaqassappata tamanna aningaasartuutaangaatsiassaaq suliamilu uppernarsaatinik saqqummiussuinissaq suliakkersuutaangaatsiassalluni. Tamassuma kingunerisaanik najugaqartut taarsiiffigineqarnissaminnut pisinnaatitaaffitik annaasinnaavaat, Andor Thomsen isumaqarpoq.

Nalikinnerulerneq

- Sanaartortoqarnissaani akuersissutini piumasaqaataasariaqarpoq, najugaqartut eqqorneqartut akornusersorneqarnertik pillugu taarsiiffigitinnissamik piumasaqaateqaraangata suliap suliarineqarneranut piffissaliussanik taarsiiffigitinnissallu annertussusissaanik maleruagassaqassasoq, sanaartornerup nalaani akornutit pillugit, aammali siunissami mittarfiup isikkiviulernerata kingunerisaanik inissiap nalikinnerulernissaa pillugu, tusarniummut Andor Thomsenip akissummini piumasaraa.

Avatangiisit pillugit naalakkersuisoqarfiup tusarniaanernit marluusunit akissuteqaatit misissuleruttorpaat, innuttaasullu tusarniutini akissutaat sanaartortitsisussamut Kalaallit Airports piumasarineqassanersut, Naalakkersuisut aalajangertussaavaat.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS