Mittarfik ntuaaq: Piviusuusaartitamik takornariarit
Kalaallit Airports qarasaasiakkut titartakkanik aalasuliamik nutaamik suliaqarsimavoq, tassani Nuuummi mittarfik nunamut illoqarfiup qanittuanut qanoq isikkoqarnissaa takulluarneqarsinnaavoq.
Siullermik timmisartup aquttarfiani issialluni mittarfimmut nutaamut mikkiartortoqarpoq. Siullermik kujataatungaanit aamma tulliani avannaatungaanit. Mittarfiup illutaanut nutaamut ingerlaartoqarpoq, tassanilu timmisartorpassuit uninngareerput.
Tamatuma kingorna biilerluni mittarfik kaajallanneqarpoq, taamaalillunilu mittarfiup nunataq qanoq sunnerniarneraa takuneqarsinnaalluarluni.
Qarasaasiakkut titartakkat aalasuliat ilaatigut takutippaa, Qinngutta qanittuani mittarfiup aqqutaanut nermallaliortoqassasoq, taannalu nutaarluinnarmik mittarfik 2200 meterisut takissusilik kaajallallugu aqquteqassaaq. Aammattaaq avannaatungaani nutaamik nermallammik peqarpoq, aqqusernillu ilaat paarnaarussivimmut nutaamut ingerlavoq.
Quassussuaq
Mikkiartornerup avannaatungaanit pisinnaanissaa pissutigalugu Quassussuup qanoq annertutigisumik qaartiterneqarnissaa aamma takuneqarsinnaavoq.
Qarasaasiakkut titartakkamik aalasuliaq nammineq isiginnaaruk – silaannarmit aamma mittarfik kaajallallugu aqqusinikkut. Qarasaasiakkut titartakkamik aalasuliaq TNT Nuuk A/S-imit suliarineqarpoq.
Uani ataani assit tooruk, video aallartissaaq:
Suliniummut pisortap tullersortaa Aviaaja Karlshøj Knudsen Kalaallit Airportsimeersoq Sermitsiaq.AG-mut ilisimatitivoq, filmimut nutaamut nukippassuit atorneqarsimasut.
- Mittarfimmut takusassiaq suliarinnittussarsiornermut atatillugu piareerneqarpoq. Taamaattumik filmimik immikkuualuttoqarnerusumik sapinngisamik piviusorpalaartumik suliaqarsinnaasimavugut, Aviaaja Karlshøj Knudsen nassuiaavoq.
- Suliniut pillugu innuttaasut akornannit toqqissisimanngittoqarnera malugisimavarput – ingammik Nuummi. Taamaattumik filmi una pingaartissimavarput, mittarfiup qanoq isikkoqarnissaa innuttaasut takorloorsinnaaniassammassuk, Aviaaja Karlshøj Knudsen oqarpoq.
Nittartagaq nutaaq
Mittarfinnik ingerlatseqatigiiffiup nittartakkani nutarteqqammerpaa, taamaalillulni maanna pingasunik isaariaqalerluni, ingerlatseqatigiiffik pingasunik ingerlatseqatigiiffeqartoq takuneqarsinnaalluni: ingerlatseqatigiinni piginnittoq ataaseq, nunanut tamalaanut ingerlatseqatigiiffik, Naalagaaffik (Nuuk aamma Ilulissaat) piginneqataasoq, kiisalu Domestic, Qaqortumi mittarfimmik sanaartortussaq.
- Mittarfiit suliarineqarnerini ataavartumik innuttaasut nittartakkatsigut paasissutissittarniarpagut, suliniummi pisortap tullersortaa ilisimatitsivoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...
