Mittarfiit: Neqerooruteqartut sapaatip-akunnerinik marlunnik sivitsuiffigineqarput
Kalaallit Airportsip neqerooruteqarnissamut piffissaq killiliussaq maajip naanerata tungaanut sivitsorpaa, neqerooruteqartut Nuummi aamma Ilulissani mittarfinnut sanaartornissamut neqeroorutitik naammassinissaanut piffissaqartinniarlugit.
Kalaallit Airports Internationalip suliassanik suliassinneqartartut piareersaataasumik piukkunnartutut nalilerneqarsimasut nalunaarfigisimavai, neqeroorutinik tunniussinermut piffissarititaq ukioq manna 15. maajimit 31. maajimut nuunneqarsimasoq.
– Neqerooruteqartut piffissamik sivisunerusumik tunineqarnissamik qinnuigisimavaatigut, taamaalillutik neqeroorutertik sapinngisamik naammattumik najoqqutaqarlutik tunngavilerumallugu, Peter Wistoft, pisortaaneq taama tusagassiuutinut nalunaarummi oqaluttuarpoq.
– Tamanna tusarnaarniarlugu qinersimavarput, tassami uagutsinnut neqerooruteqartunullu pingaarluinnarpoq, neqeroorutit tamarmik tatiginartuunissaat, suliarilluarsimanissaat aamma tamakkiisumik uppernarsarsimanissaat – taamaammat neqerooruteqarnermut piffissarititaq sapaatip-akunnerinik marlunnik sivitsorparput.
Nuummi aamma Ilulissani mittarfiliornissamut piukkunnartunut arfinilinnut sanaartugassanik suliarinnittartunut, danskit naalagaaffiata marsip arfernanni isumaqatigiissuteqarfigineqarnerata kingorna suliarinnittussarsiorneq aallartinneqarpoq.
Kinguartitsineq neqerooruteqartunut tamanut atuuppoq, aamma suliarineqarnerinut piffissamut pilersaarummut imaluunniit taassuma saniatigut pissutsinut allanut sunniuteqassanngilaq.