Mittarfiit tallineqarnissaat assammik arsartartut kattuffianit qilanaarineqarpoq
Assammik arsartartut kattuffiata nunat assigiinngitsut suleqatigiinnissaq kiisalu unammersuaartitsinissat aallaavigalugit oqaloqatigereerpai. Nuummi mittarfik tallereerpat nunat tamalaat unammersuaartinneqassasut kattuffimmit neriuutigineqarpoq
- Nuummi mittarfik tallereerluni atuleqqippat tikittut siulliit tassaassapput nunanit allanit Nunatsinnut unammiartortut.
Timersoqatigiit Assammik Arsartartut Kattuffianni siulittaasoq Jørgen Isak Olsen Sermitsiaq.AG-imut oqarpoq. Nunat sisamat unammersuaartinneqarneranni Kalaallit Nunaata aaqqissugaannik unammisitsisoqassasoq neriuutigalugu.
Suleqateqarneq
Nuummi 2018-mi Pan Am-imi unammersuaartitsinermi Kalaallit Nunaat aaqqissuussilluarsimasutut nalilerneqarsimasoq oqaatigaa.
- Nunat peqataasut tamarmik naliliineranni aaqqissuussarput nersualaarneqarpoq, bussinik ingerlaartarneq taamaallaat aaqqinneqarsinnaasutut tikkuarneqarluni. Ineriartoqqissagutta nunanik allanik suleqateqartariaqarpugut. Savalimmiormiut, Canadamiut aamma USA-rmiut oqaloqatigereerpagut, Islandikkut aamma suleqatigilersinnaanissaat ammaffigaarput. Mittarfissat piareerpata periarfissarpassuit ammakaassapput, tassami ajornannginnerusumik tikinneqarsinnaalerlutalu ajornannginnerusumik angalasinnaalissaagut, Jørgen Isak Olsen oqarpoq.
Taamaattumik unammersuariaaseq nutaaq sulissutigineqartariaqartoq isumaqarpoq.
VM-imut annguttoqartariaqartoq
Angutit nunanut allanut unammisartut Mexicoliartussaagaluarput juunimi VM-imut anngunniukkiartorlutik. Coronavirusertoqarnera pissutaalluni anngunniunnissaq piffissaligaanngitsumik kinguartinneqarpoq.
- Kisianni tassa nunanut allanut unammisartunut sungiusaasut VM-imut anngutsinniarluta atorfinitsinneqarnikuupput. Angutit anngunniunnermi ajugaasussatut inissisimatinneqarput, tamannalu anguneqassasoq kiisalu VM-imut anngunnissarput naatsorsuutaavoq, assammik arsartartut kattuffianni siulittaasoq oqarpoq.
Panamerikami assammik arsartartut kattuffissuata avinneqarnikuunera Jørgen Isak Olsenimit nuannaarutigineqarpoq, Kalaallit Nunaat taamaasilluni Amerikami avannarlermeersut Caribiameersullu anngunniunnerni unammisalissallugit. Kattuffissuarmi nutaami turneringsudvalgimi Nunarput siulittaaasuutitaqarpoq, taamaasilluni IHF-imut attaveqarniarneq ajornannginnerulernikuulluni.