Mittarfiit pillugit nuna tamakkerlugu isumaqatigiittoqarnissaanik piumasaqarpoq

USA-p mittarfinnut aningaasaliinissamut pilersaarutai pillugit innuttaasut ilanngunneqartariaqaraluartut, Aqqaluaq B. Egeden isumaqarpoq

IA-mi siulittaasuugallartoq, Aqqaluaq B. Egede, mittarfiliortiternissat pillugit Naalakkersuisut aamma Demokraatit isumaqatiginninniarusussuseqarnissaannik ujartuivoq.

- Partiit allat Naalakkersuisulluunniit mittarfinnut tunngasunik isumaqatiginninniarnernik pimoorussanik aggersaasimannginnerat uggornartutut isigaarput. Ataatsimiititaliani sulineq paasissutissanik amikkittoortuarfiulluni ingerlanneqarpoq, isumaqatiginninniarnertullu iluseqanngitsumik ingerlanneqarsimallutik. Atituumik isumaqatigiissuteqarneq naalakkersuisooqatigiit illuatungiliuttullu akimorlugit isumaqatigiinnertut isigaarput, taanna oqarpoq.

Kittaartumik sanaartortoqarli

Mittarfiliortiternissamut aalajangiineq taama annertutigisoq nuna tamakkerlugu isumaqatigiittoqarneranik tunngaveqartariaqartoq, Aqqaluaq B. Egede isumaqarpoq. Isumaqatigiinnerup imassaanut aamma siunnersuuteqarpoq.

- Taamaammat mittarfiliornissanut siunnersuusiamik tamat oqallinnerannit partiittalu oqaloqatiginnittarneri aallaavigalugit nuna tamakkerlugu naaperiutitut isumaqatigiissutigineqarsinnaasumik saqqummiussivugut. Siunnersuusiatsinni mittarfiliortiternerit kittaartumik ingerlanneqarnissaat aallaaviuvoq, taamaaliornikkut nunatta aningaasaqarnerani akit qaffapiluunnginnissaat suliffeqarfeqarnikkullu nammassisinnaajunnaannginnissaq qulakkeerumallugu.

Isumaqatigiittoqarnissaa periarfissaasinnaagaluartoq, Inuit Ataqatigiit isumaqarput, ingammik paasissutissat tamarmik qaqinneqartuuppata.

- Isumarput naapertorlugu immitsinnut ungasinngikkaluarpugut, tassani Qaqortup mittarfissaata tikikkuminassusaa, amerikamiullu Kangerlussuarmi mittarfinniluunniit allani soqutigisaqarnerat pillugu paasissutissanik suli amigaateqartoqarnera eqqarsaatigalugu.

USA-p soqutigisai pillugit ammasumik oqallittoqarnissaa piumasarigaat

Ingammik amerikamiut soqutigisaannut tunngatillugu, qulaajaasoqartariaqartoq, partii piumasaqarpoq.

- Siunersiuinissat arlallit piumasarisimavavut, kingullermik Ilulissat mittarfiata 2800 meteriutinnissaanut amerikamiut milliartilikkaanik aningaasaleeratarsinnaanerannut tunngatillugu. Siunersiuinissamik piumasaqarnerput amerlanerussuteqartunit piumaneqanngilaq.

- Innuttaasut angallannerannut mittarfiit sakkutooqarnermut atorneqarsinnaanngorlugit ilanngussisoqassanersoq apeqqummut innuttaasut siammasissumik peqataatinneqarnissaminnut pisussaaffeqarfigineqartut isumaqarpugut. Kalaallit Nunaata Issittumi sakkulersoqqinnissamut nunaminertanik atuiffigineqassanngitsoq uagut erseqqissumik isumaqarpugut.

- Amerikamiut aningaasaleeratarsinnaanerisa malitsigisaannik illersornissakkut isumaqatigiissutit, ingammik amerikamiut mittarfiliortiternernut peqataassappata pisoqalisoorsimalersussat, isumaqatiginninniutigineqaqqinnissaannik piumasaqaammik malitseqartitsisoqassasoq isumaqarluinnarpugut.

Tamatuma saniatigut mittarfiliortiternissamut pileraarut siunissami unammilligassat minnerusuinnaat akissutissartaqartikkai, Aqqaluaq B. Egeden (IA) isumaqarpoq. Ilaatigut aamma nunap immikkoortuini angallannerup ilusaa pileraarummut ataatsimoortumut ilanngullugu suliarineqarnissaanik ujartuivoq.

- Mittarfiit imminerminni ineriartortitsinaviannginnerat namminiilivitsitsinaviannginnerallu erseqqissarumavarput.

Akerlianik mittarfiliortiternerit malitsigisaannik suliani annertuuni toqqaannartumik nunaqavissunik akuutitsinerit, mittarfinnullu atasunik sunniuteqaataasumik inuussutissarsiutit iluatsittumik ingerlanneqarpata, taassuma tungaanut iluaqutsiissapput. Tassanilu nunaqavissut akuutinneqarnissaannut, piffinnilu aamma Nuup, Ilulissat Qaqortullu avataanni ineriartornernut pilersaarummik erseqqissumik amigaateqartoqartoq isumaqarpugut.

Powered by Labrador CMS