Skip to main content

Mittarfiit pillugit isumaqatigiissut atsiorneqarpoq

Mittarfiit nutaat sanaartorneqarnissaannut isumaqatigiissutit Kalaallit Airports International A/S-ip aamma Munck Gruppen A/S-ip atsiorpaat.

Ullormi Siumup iluani eqqissiviilliorfiusumi, mittarfinnut suliniut toqqaannanngitsumik sunniuteqarnerani, Kalaallit Airports International A/S aamma Munck Gruppen A/S, Nuummi aamma Ilulissani mittarfiit nutaat sanaartorneqarnissaannut pingaarnertut sanaartornermik suliarinnittussanut isumaqatigiisutit maanna atsiorsimalerpaat.

Aningaasaqarnermut ataatsimiititaliami amerlanerussuteqartut Siumumilu ataatsimiititaliamut ilaasorta ilanngullutik tallimanngormat atsioqatigiinnissap unitsikkallarnissaanik kajumissaaruteqarnerisa kingorna, tamanna pivoq.

Kisianni kajumissaarut tamanna Naalakkersuisut malinniarnagu aalajangerput.

- Sanaartornermut inatsit Inatsisartut 2018-imi akuerisaat naapertorlugu aammalu tassani killissaliussat iluanni sanatitsisup sanaartortussallu akornanni isumaqatigiissutit isumaqatigiissutigineqarput, Kalaallit Airports tusagassiuutinut nalunaarummi taama allappoq.

Isumaqatigiissutit ullumikkut Nuummi ammasumik nalliuttorsiorpalaartumik atsiorneqartussaagaluarpoq. Kisianni nalliuttorsiorpalaartitsineq tallimanngormat taamaatinneqarpoq, ’pilersaarusiornermut angalanermullu tunngasunut’ pissuteqartinneqarluni.

Taarsiullugu isumaqatigiissutit Københavnimi ammanngitsumik nalliuttorsiutigalugit atsiorneqarput.

Oktobarip aallaqqaataani aallartissasoq

Juulimi isumaqatigiissutit isumaqatigiissutigineqarmata Munck Gruppenip sulineq piareersarlugu aallartippaa.

Pilersaarut malillugu sanaartorneq kingusinnerpaamik ukioq manna 1. oktober aallartissaaq. Mittarfiit taakku marluk pilersaarut malillugu 2023-ip naanerani piariissapput.

- Ingerlatseqatigiiffiup tungaaniit ukiut pingasut sinnerlugit annertuumik piaareersaalluni suliaqareernerup kingorna, sanaartornermik suliaqarnerit pimoorussamik aallartinnissaat qilanaarisorujussuuarput, Kalaallit Airportsimi pisortaaneq, Peter Wistoft, tusagassiiutinut nalunaarummi taama oqarpoq.

- Sulisut siunnersuisartullu pikkorissut aammalu annertuumik aallussisut qanimut suleqatigalugit sulineq nuannersorujussuusimavoq, aammalu taamaaqataanik Munck Gruppen A/S-ip suleqatigilluarnerata ingerlaannarnissaa qilanaaraarput. Munck Gruppen A/S peqatigalugu piffissami akigititamullu isumaqatigiissutigineqartumi suliassat ingerlannissaat, aammalu suliaqarnerup ingerlanerani mittarfiup eqqaaniittunut akornutaasussat annikillisinnissaat, sulissutigissavarput, taamatullu suliassat siumut ingerlanerat pillugu ingerlaavartumik paasissutissiisassalluta.

Illutai 2020-imi suliarinnittussarsiorneqassapput

Mittarfinni marlunni taakkunani mittarfiit illutassai pilersaarutit malillugit 2020-imi neqeroortitsivigineqassapput, aammalu tassani ilaatinneqassallutik mittarfinni terminalit ullutsinnut naleqquttut nutaaliaasullu, nakkutiginninnermut napasuliaq nutaaq aamma sullissinermut illutassat nutaat. Aamma taakkua pilersaarutit malillugit 2023-ip naalernerani naammassissapput. 

Munck Gruppenimut sanatitsisup sanaartortussallu akornanni isumaqatigiissutit isumaqatigiissutiginerisa saniatigut Kalaallit Airports International A/S aammattaaq danskit naalagaaffiannut aamma Den Nordiske Investeringsbankimut katillugit kr. 900 mio.-inik taarsigassarsinissamut inaarutaasumik isumaqatigiissuteqarpoq, taamaalilluni mittarfiliassat aningaasalersorneqarnissaat danskit naalakkersuisuisa, Naalakkersuisut aamma Kalaallit Airports International A/S-ip akornanni isumaqatigiissutigineqartoq inissitsinneqarluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER