Mittarfiit pillugit isumaqatigiissummi Demokraatit nalornisitsilertut

Naalakkersuisut Naalagaaffiullu mittarfiit pillugit isumaqatigiissutaanni, Naalakkersuisut tapersersortai nalornisitsilerput. Naalagaaffiup SAS-illu Air Greenlandimi piginneqatigiissutaasa Naalakkersuisut pisiarinninniarnerat, Demokraatit akuerinngilaat

Mittarfiit pillugit isumaqatigiissummut Demokraatit isumaqataalluaraluarlutik, taamaattoq Lars Løkke Rasmussenip (V) Kim Kielsenillu (S) paaseqatigiillutik isumaqatigiinnerannut septembarimi atsiorneqartumut, tapersiinngillat.

Mittarfiit pillugit isumaqatigiissut pillugu Inatsisartut ataatsimiinneranni, Naalagaaffiup Air Greenlandimut piginneqatigiissutaannik Namminersorlutik Oqartussatpisiniarnerat partiip isumaqatiginngikkaa, partiip siulittaasua Niels Thomsen oqarpoq.

- Siornatigut oqaatigeriikkatsitut, Namminersorlutik Oqartussat Air Greenlandip piginneqatigiissutaanik pisiniarneranut isumaqataanngilagut. Taamaattumik Naalakkersuisut danskillu naalakkersuisuisa paaseqatigiillutik isumaqatigiissutaanni tassunga tunngasoq akuerisinnaanngilarput, Niels Thomsen (D) Sermitsiaq.AG-mut oqarpoq.

Pisortanit pigineqartut ikinnerutikkusukkai

Niels Thomsen liberaliusumik politikkeqarnini pissutigalugu, Namminersorlutik Oqartussat timmisartuutileqatigiiffimmik piginneqataanertik annertusissanngikkaat isumaqarpoq.

- Tunngaviusumik isumaqarpugut nunatsinni pisortanit pigineqartut ikilisarneqassasut, taamaammat assigiinngitsuni suliaqarfiusuni unammillerfiusinnaasuni pisortat akuunerat annikillisarneqartariaqartut isumaqarpugut. Unammilleqatigiiffiunngitsunik ingerlanneqartut Namminersorlutik Oqartussanit pigineqarsinnaapput.

Illuatungaanulli ingerlasoqartariaqartoq, Demokraatit isumaqarput.

- Namminersorlutik Oqartussat Air Greenlandimi piginneqatigiissutaat annertusissanngilaq, illuatungaanilli namminersortunngorsaasariaqarpugut.

Itigartitsisinnaaneq pillugu ersarissaasoqarli

Isumaqatigiissummi mittarfiit pillugit immikkoortoq Demokraatit taperserpaat. Isumaqatigiissutilli akuerineqartinnagu, Niels Thomsen paasissutissanik amerlanerusunik ujartuivoq.

- Mittarfiit pillugit isumaqatigiissummi danskit akuunerunissaat isumaqatigiissutitsialaasoq isumaqarpugut, suliamimi tassani aningaasaqarnermut iluaqutaassammat.

- Partiilli allat assigalugit, soorpiaat isumaqatigiissutiginiarneqarnernut ujartorparput. Pingaartumik piginneqatigiinnermi naalagaaffiup itigartitsisinnaaneranut tunngasoq paaserusupparput.

- Inatsisartut akuersissapput

Danmarkimut isumaqatigiissut Inatsisartuni immikkut oqaluuserisassanngortinneqarnissaanik partii piumasaqassanersoq, Niels Thomsenip itisilerumanngilaa. Aalajangiusimalluguli akuersinissamut tunngatillugu Naalakkersuisut neriorsuutertik eqquutsittariaqaraat.

- Isumaqatigiissut Inatsisartuni akuerineqaqqaassasoq aalajangiusimavarput, oqarpoq.

Air Greenlandimulli piginneqatigiissutit isumaqatigiissummiiginnassappata, Danmarkimut isumaqatigiissutip itigartinnissaa Demokraatit piareersimaffigissaneraat pillugu, Niels Thomsen aalajangiusimarusunngilaq.

Powered by Labrador CMS