Mittarfiit pillugit immikkut ataatsimiittoqarnissaa Suleqatigiissitsisut kissatigaat

Mittarfiliortiternissamut pilersaarutit pillugit apeqqutit akissutissarsineqarsimanngitsut amerlavallaartut, Tillie Martinussen isumaqarpoq

Siunissami mittarfeqarnissaq pillugu aalajangiinissamut suli tunngavissaqanngitsoq, Suleqatigiissitsisut Inatsisartuni ilaasortaatitaat, Tillie Martinussen isumaqarpoq. Taamaammat immikkut ittumik ataatsimiisitsisoqassasoq taanna siunnersuuteqarpoq.

- Mittarfiliortiternissamut pilersaarut kisiat qulequtaralugu ataatsimeeriarta, oqaluttarfimmit oqaaseqaataani allaqqavoq.

- Nipiliuutigineqarpoq nunami aningaasaliiffissat annerpaartaat asuli akueritipallanniarsarineqartoq amerlanerussuteqaqqalaarneq sakkugalugu. Inuit paasiuminaatsippaat milliardit qanoq amerlatiginersut, uani mittarfiliortiternissamut atatillugu atorusuppagut 3,6 milliaardit koruunit - sunniutissai sillimaffiginngivillugit.

Nunatta aningaasaqarnera ernummatigigaa

Pilersaarutit akuerineqassappata tamanna ajorluinnartumik kinguneqarumaartoq aarleqqutigaa.

- Mittarfiliortiterniarnerit maannakkutut isikkoqarallartillugit, Kalaallit Nunaata aningaasaqarnera sakkortoorsuarmik sunnissavaa. Imaassinnaavoq masseqqinngisaannartugut.

- Nutarterinissaq akerlerinngilarput, tamannali pisariaqarpoq piviusorsiortumik paasisimasaqarluartumillu - aamma tamanna pissanngilaq meeqqat inuusuttullu pilliutigalugit, inuiaqatigiinni sanngiinnersagut aamma pilliutigineqassanngillat, taakku aamma aningaasaliiffigisinnaasariaqarpagut.

Inuit Ataqatigiit assigalugit, Aningaasaqarnermullu Siunnersuisoqatigiit innersuussinera malillugu, mittarfiit tulleriiaarlugit sanaartorneqassasut siunnersuutigaa.

- Nuuk kisimi sinneqartoorfiusussatut isikkoqarallarpoq. Tusagassiutillu malissagaanni, Ilulissat ilaatigut USA-mit illersornissamullu ministeriaqarfimmit aningaasalersorneqarluni mittarfissuartaassaaq.

Akissutit amigaatigai

USA-p pilersaarutai pillugit paasissutissat amerlanerusut Suleqatigiissitsisut ujartorpaat.

- Amerikamiut aningaasaliissutissaat qanoq issappat? Qanoq annertutigissappat?

- Sooq Nuummi mittarfiit 2200 meterinik takissuseqarnissaa aalajangiusimaneqarpa – nutaanngilipallattussaavormi? Kangerlussuaq Narsarsuarlu qanoq pineqassappat? Air Greenland pisiarineqarniarpoq, kisianni sunnguamilluunniit tusarfiginngilarput susoqassanersoq imaluunniit qanoq akeqassanersoq? Taamaallaat kiffartuussinermut isumaqatigiissuteqarfiit kiffartuunneqarniarpat?

- Mittarfissualiortiternissat kisiisa taasissutigilinngilagut, aammali aningaasartuutaasussat allat, qanoq annertutigisumik aningaasartuutaassanersut qanorlu pilersaarusiussanersut piviusunngortinneqassanersullu ilisimaarinagit taasissutigineqalerput.

- Taamaattumik naaggaarpugut.

Powered by Labrador CMS