Mittarfiit maanna suliarinnittussarsiorneqarsinnaanngorput
Piginneqataassutsimut isumaqatigiissut naalagaaffimmit, Naalakkersuisunit aamma Kalaallit Airportsimit ullumi Københavnimi atsiorneqarpoq.
Nuummi aamma Ilulissani mittarfiit sanaartorneqarnissaasa aallartinnissaat isumaqatigiissutigineqarpoq.
Kalaallit Airport Internationalimik danskit naalagaaffiata 33,3 procentimik piginneqataassuteqarnissaanut isumaqatigiissut ullumi atsiorneqarpoq. Statsministeriami nalunaaqutaq 9.30 nalliuttorsiortitsisoqarneratigut tamanna pivoq, Naalakkersuisut siulittaasuat Kim Kielsen, ministeriuneq Lars Løkke Rasmussen aamma Kalaallit Airportsimi siulersuisunut siulittaasoq Johannus Egeholm Hansen isumaqatigiissummik atsiorput.
Sapaatip-akunnerata siuliani Lars Løkke Rasmussenip aamma Kim Kielsenip nalunaarutigaat, isumaqatigiissut isumaqatigiissutigineqarsimasoq. Tamatuma kingorna Inatsisartuni aningaasaqarnermut aamma akileraartarnermut ataatsimiititaliamut saqqummiunneqarpoq. Tassanilu inatsisitigut allagartat uppernarsaatit atsiorneqarsinnaanngorput.
Kalaallit Airports International tassaavoq Kalaallit Airportsip pigisaa, Ilulissani aamma Nuummi mittarfiliortussaq. Isumaqatigiissuteqartoqarneratigut suliassaq maanna suliarinnittussarsiorneqarsinnaanngorpoq.