Mittarfiit kittaartumik sanaartorneqaratarsinnaapput
Nuummi aamma Ilulissani mittarfissat suliarinnittussarsiorneqalerput, pilersaarullu malillugu 2023-imi piareerneqartussapput. Kisianni piffissaliunneqartoq suli allanngorsinnaavoq. mittarfiit taamaalillutik kittaartumik sanaartorneqassallutik.
Statsministeriami atsioqatigiittoqareernerani Nuummi aamma Ilulissani mittarfiit 2023-imi kvartalit sisamaanni piareersinnaapput. Akilersinnaanerunersoq paasinarsissappat, pilersaarummut piffissaliussaq allanngorsinnaavoq.
Kalaallit Airports Internationalimi piginnittuunermut isumaqatigiissut Naalakkersuisut siulittaasuata Kim Kielsenip, ministeriunerup Lars Løkke Rasmussenip aamma Kalaallit Airportsimi siulersuisunut siulittaasup Johannus Egeholm Hansenip atsiorpaat.
- Aningaasaliissutit maanna inissipput, sapaatip-akunnerata siuliani Nuummi ASN-imut nassuiaat akuerineqarpoq, taamaalilluta suliarinnittussarsiornissamut piereerpugut; maannalu suliarinnittussarsiorpugut, Kalaallit Airportsimi pisortaagallartoq, Peter Winstoft Sermitsiaq.AG-mut oqarpoq.
- Sanaartugassanik suliarinnittartut piukkunneqartut ukiup aappaa avillugu suliareriigarput qimerloorsinnaanngorpaat, maajillu qiteqqunnerata tungaanut naatsorsuusiorsinnaapput neqerooruteqarlutillu.
- Mittarfinnut taakkununnga akigitinneqartussat takunissaat aamma naatsorsuutigut ajunnginnersut pissanganarpoq.
- Neqeroorutit missingersuutigisasi qaangerujussuarpatigit, taava qanoq pisoqassava?
- Naatsorsuutigut qaangerlugit inissisimassappata, taava piginnittutsinnut utertariaqassaagut, pisorlu oqaluuseralugu. Taava pisoq nutaaq inissisimaffigilissavarput.
Aasaanerani sulinngiffeqarneq sioqqullugu sanaartugassanik suliarinnittartoq ajugaasoq Kalaallit Airportsip atsioqatiginissaat naatsorsuutigaa, qaartiterinerillu siulliit septembarimi aallartissinnaanngornissaannik tamanna isumaqarpoq, taama nalilerneqarpoq.
- Piffissaliussamut pilersaarut taamaatsillugu, tassa sanaartugassanut suliarinnittartunut suliarinnittussarsiuussatsitut, 2023-imi kvartalit sisamaanni piareerneqassapput.
Taamaattorli sivisunerulaarnissaannik aalajangertoqariasaarsinnaavoq.
- Sanaartugassanik suliarinnittartut aamma piffissaliussamut pilersaarummik saqqummiussatsinnik allaanerusumik misissuinissaat qinnuigaagut. Taava piffissaliussatut pilersaarummik allaanermik malunnaatilimmik sipaaruteqartoqarsinnaappat, taava piginnittutsinnut marlunnut uterluta taamatut sipaaruteqarusuttoqarnersoq aperissaagut imaluunniit piffissaliunneqartoq maliinnarneqassanersoq tusarniarlugu.
Taamaalilluni Nuummi aamma Ilulissani mittarfiit ataatsikkut sanaartorneqarnissaannut imaanngilaq aalajangiisoqartoq.