Kalaallit Airports
Mittarfiit suli akisunerulersinnaapput
Mittarfinnik pingasunik milliardinik akilinnik økonomit aarlerisaaruteqaraluartut, inatsisissatut siunnersuummik pilersinneqarnissaannut pingaarutilimmik alloriartoqarpoq, taakkulugu tusarniaatigalugit nassiunneqaqqammerput. Aningaasartuutillu 3,6 milliardininngaanniik 4,4 milliardinut amerleriaratarsinnaapput.
Attaveqaqatigiinnermut naalakkersuisup Erik Jensenip ataasinngornermi mittarfiit pingasut Ilulissat, Nuuk aamma Qaqortoq piumasaqaatit sinaakkutaannut inatsisit tusarniaatigisussanngorlugit nassiuppai.
Sanaartorneq, aningaasaliineq aamma ingerlatsineq
Inatsisip sinaakkutit qitiusut aamma tunngaviusut Kalaallit Airportsip mittarfissuarnut Ilulissani aamma Nuummi kiisalu Qaqortumi mittarfissamik sanaartorneranut, aningaasaliineranut ingerlatsineranullu aalajangersarpai.
Mittarfinnut pilersaarutit annertuut aningaasalersorneqarnissaat aningaasaqarnikkut pisariussaaq. 2018-mut aningaasanut inatsimmut atatillugu aningaasaqarnermut naalakkersuisoqarfiup aningaasaliinerit qanoq amerlatiginissaat saqqummiuppai.
Tusarniaanermit atuarneqarsinnaavoq, mittarfiit pingasut sanaartorneqarnissaat 3,6 milliardinik akeqarnissaat suli naatsorsuutigineqartoq. Kisianni aningaasartuutiviit 4,4 milliardit koruuninngorsinnaapput.
800 millionit koruuninik margenilik
Namminersorlutik Oqartussat 2,4 milliardit koruunit aningaasaliiffiginissaammi naatsorsuutigineqarpoq. Taamaattumillu taarsigassarsinikkut 1,2 milliardit koruunit aningaasaliissutigineqarnissaat taamaallaat pisariaqartinneqartoq isumaqartoqarsinnaavoq, kisianni inatsisissatut siunnersuummi atuarneqarsinnaavoq, inatsisitigut margenimik 800 millionit koruunit tikillugit saniatigut qaangiinissamut kissaatiginnittoqartoq.
- Namminersorlutik Oqartussat Kalaallit Airports A/S-imut 2,0 mia. koruunit tikillugit taarsigassarsianut qularnaveeqqusiinissaat imaluunniit taarsigassarsititsinissaat siunnersuutigineqarpoq, inatsisissamut nassuiaatini allaqqavoq.
Aamma atuarneqarsinnaavoq ''Kalaallit Airports A/S-ip niuernermik tunngaveqarluni niuernermilu atugassarititaasut atorlugit ingerlatsisinnaanissaat, aammalu ingerlatseqatigiiffiup pisussaaffimminik, minnerunngitsumillu avataanit taarsigassarsititsisunut pisussaaffimminik naammassinninnissaanut isertitassatut pisariaqartinneqartunik qulakkeerisinnaanissaa pingaaruteqarpoq.''
Atuinermut akit
Ingerlatseqatigiiffiup atuinermut akit akinullu tunngaviusut ingerlatseqatigiiffiup aalajangersartassagai allaqqavoq. Atuinermut akit qanoq issanersut, aamma bilitsinut akinut qanoq sunniuteqassanersut oqaatigineqanngilaq.
Ingerlatseqatigiiffiulli sinneqartooruteqarnissaa siunissami ungasissumiittoq atuarneqarsinnaavoq.
- Piviusunngortinneqarsinnaasorineqanngilaq, Kalaallit Airports A/S-imit ukiuni qulini siullerni sinneqartoornermik taamaattumik pilersitsisoqarsinnaanera, ingerlatsiviup piginnittuanut sinneqartoorutinik tunniussinissamut tunngavissaqarsinnaaneranut. Tassunga tunngaviuvoq, ingerlatsiviup aningaanik isaatitsinerata annerpaartai naatsorsuutigisatut atorniarneqartussaasunut pisussaaffinnut atorneqarnissaat, Erik Jensenip naalakkersuisoqarfia inatsimmut nassuiaatini allappoq.
Ammaneruneq
Mittarfiit ingerlanneqarnerini ammanerulersitsiniartoqarnera oqaatigineqarpoq, Kalaallit Airports A/S isumaqatigiissutitigut pisussaaffilersorneqarsinnaanngitsoq ingerlatsivimmi sinneqartoorutit mittarfittut aaqqissuussap sinnerani amigartoorutinut atugassatut aningaasaliissuteqarnissaannut.
Naalakkersuisoqarfiit, kommunit, kattuffiit aamma suliffeqarfiit amerlasuut tusarniaanermut akissuteqaqqullugit qinnuigineqarput, akissuteqaammillu tunniussinissamut februaarip 19-at ulluliunneqarpoq.