Mittarfiit akii aappaagu saqqummiunneqassaaq

Mittarfiliortiternernut suliarinnittussarsiornerit naammassineqarpata aatsaat Kalaallit Airportsip Nuummi Ilulissanilu mittarfiit sanaartorneqarnerinut aki ilisimatitsissutigissavaa

Nuummi Ilulissanilu mittarfiit illutaannik sanaartorneq 2020-imi suliarinnittussarsiorneqassaaq, tamatumalu kingorna aatsaat mittarfinnut taakkununnga marlunnut aki paasissavarput.

Mittarfiit taakku marluk Munck Gruppenip sanaartorneranut qanoq pissarsiaqarnersut, piffissami matumani ilisimatitsissutiginissaat kissaatiginagu, Kalaallit Airportsip siornatigut nalunaarutigereerpaa.

Illunut sanaartornissamut neqerooruteqartut, suliami tassani missingersuutini aningaasat qanoq amerlatigisut sinnerunnersut naatsorsorsinnaannginnissaat pissutaavoq.

- Illunut neqerooruteqartitsineq naammassineqarpat, mittarfiit taakku marluk akii ilisimatitsissutigilersinnaallugit uppernarsarasinnaavara, Kalaallit Airportsimi pisortaaneq, Peter Wistoft, Sermitsiaq.AG-mut taama oqarpoq.

Munck Gruppenimut isumaqatigiissut ippassaq atsiorneqarpoq.

Sanaartornermik suliaqartut kingusinnerpaamik ukioq manna 1. oktober aallartissapput. Pilersaarutit malillit mittarfiit marluk 2023-p naanerani piareerneqassapput.

Powered by Labrador CMS