Mittarfiit 1.200 meterini inuiaqatigiit aningaasaqarnerat ajornerussasoq
Mittarfiit 1.200 meterinik takissusillik inuiaqatigiit aningaasaqarnerannut amigaartooruteqartitsissapput, misissueqqissaarnerup tamanna takutippaa.
Nuummi, Ilulissani aamma Qaqortumi mittarfinnik 1.200 meterinik takissusilinnik sanaartortoqarli – Kangerlussuaq Nunatsinnut pingaarnertut tikiffiutiinnarlugu. Partii Naleraq ingammik taama isummersornikuuvoq.
Taamaattumik aningaasaqarnermut akileraartarnermullu ataatsimiititaliap taamatut aaqqiissuteqarsinnaaneq inuiaqatigiit aningaasaqarnerannut tunngatillugu misissueqqissaarfigineqarnissaa piumasarisimavaa.
Inuiaqatigiit aningaasaqarnerannut tunngasunik misissueqqissaarnerup pioreersumi periarfissat marluusut saniatigut periarfissat marluk naatsorsuiffigineqarsimasut, isumaliutissiissummi atuarneqarsinnaavoq.
Periarfissatut ilusiligaq 3-mi Kangerlussuaq 2.810 meterinik takissusilimmik mittarfeqartillugu attatiinnarneqassaaq. Nuummi, Ilulissani aamma Qaqortumi 1.199 meterisut takissusilinnik mittarfiliortoqassaaq, Narsarsuaq qulimiguulinnut mittarfinngorluni. Periarfissatut ilusiligaq 4-mi Kangerlussuarmi mittarfik 2.200 meterimut naalisinneqassaaq, sinnerilu periarfissat pingajuannitut takissuseqaannassallutik.
- Inerniugallartut takutippaat periarfissatut ilusiliaq 3 ullumikkut naliusut naapertorlugit ilanngaaseereerluni -666 mio. kr.-inik kinguneqassasoq aammalu periarfissatut ilusiliaq 4 ullumikkut naliusut naapertorlugit ilanngaaseereerluni -616 mio. kr.-inik kinguneqassasoq.
Tassani kisianni naatsorsuusiaannaagallarnert aamma eqqoriaanertaqartut naqissuserneqassaaq.
Tamanna periarfissatut ilusilikkanit marlunni Nuummi aamma Ilulissani 2.200 meterisut takissusilinnit mittarfeqarnermit aamma Qaqortumi 1.500 meterisut takissusilimmik mittarfeqarnermit ajorneruvoq. Taamaattorli maanna mittarfiit ingerlatiinnarneqarnerannit pitsaaneruvoq, tassanilu inuiaqatigiinnut 1.085 millionit koruuninik annaasaqarnermik naleqassalluni.
Periarfissatut ilusiligaq 1-mi, Nuummi aamma Ilulissani 2.200 meterisut takissusilinnik mittarfiliortoqartillugu aamma Qaqortumi 1.500 meterimik takissusilimmik peqalersillugu kiisalu Kangerlussuarmi Narsarsuarmilu mittarfiit qulimiguulinnut mittarfinngortinnerisigut, inuiaqatigiit aningaasaqarneranni 280 millionit koruuninik iluanaaruteqarfiussaaq. Periarfissatut ilusiligaq 2-mi Kangerlussuaq naannerusumik mittarfeqalersinneqassaaq, taannalu 241 millionit koruuninik amigartooruteqarfiussaaq.
Naatsorsuinermi danskit naalagaaffiata aningaasaliinissamut siumut kalerriutigisaat ilanngunneqarsimanngilaq.