Mittarfeqarfiit: Timmisartut orsussaat akisunerulerpoq

Aggustip aallaqqaataani ikummatissat, Mittarfeqarfiit tuniniagaasa akii qaffapput. Akit nutaat toqqaannartumik nunarsuarmi akit nalinginnaasumik qaffannerannik pissuteqarput, selskabi tusagassiorfinnut nalunaarutikkut nassuiaavoq.
Pineqarput ikummatissat dieseli, benzina, petruuliu timmisartullu orsussaa JET A-1 kiisalu AVGAS. Akit annikitsumik qaffanneqarnerat KNI Polaroil A/S-ip akinik nutaanik atuutitsilerneranik toqqaannartumik kinguneqarpoq. KNI Polaroil A/S Mittarfeqarfinnut pilersuisuuvoq, ileqquuvorlu nunarsuarmi tuniniaavinni akit nikerarnerat Mittarfeqarfiit akigititaasa malittarai, tusagassiorfinnut nalunaarummi allassimavoq.
Akit qaffariarnerat pissutigalugu Mittarfeqarfiit ikummatissanik tuniniaanermini iluanaarutai qaffariassanngillat. Mittarfeqarfiit ikummatissanik tuniniaanermini matusissutissatut atukkani atuinnarpaa, taamaasillunilu timmisartortitseqatigiiffinnut sullissinini nalinginnaasoq attatiinnarsinnaallugu. Taamaasilluni Mittarfeqarfiit akit allanngortinnerisigut iluanaaruteqarnavianngilaq, selskabi tusagassiorfinnut nalunaarutikkut paasissutissiivoq.
– Nalinginnaasuulluinnarpoq ikummatissanut akigititatta pilersuisutta akigititai malittarmagit. Aallaavigaarput nunarsuarmi tuniniaavinni akit allanngoraluarpataluunniit ikummatissamut liiterimut tunisatsinnut øre-ngorlugit matussutissat attatiinnassagivut, Mittarfeqarfinni attaveqarnermut pisortaq Hans Henrik Lichtenberg tusagassiorfinnut nalunaarutikkut nassuiaavoq.