Mittarfeqarfiit ukiunik 30-nngortorsiornerat nalliuttorsiutigineqarpoq
Mittarfeqarfinnik ingerlatseqatigiiffik nalliuttorsiornermut atatillugu kaffisortitsiniarpoq
Mittarfeqarfiit 1988-imi pilersinneqarnerannut atatillugu ukiunik 30-nngortorsiorlutik nalliuttorsiorput.
Nalliuttorsiorneq illoqarfinni timmisartunut mittarfeqarfiusuni helikopterinullu mittarferqarfiusuni sulisulinni kaffillerutigineqassaaq.
- Nalliuttorsiorneq Mittarfeqarfiit sumiiffigisaanni kaffillerutigissallugu aalajangersimavarput. Ullorsiornissarput qilanaarivarput, ukiunimi 30-ni issittumi timmisartunut mittarfinnik helikopterinullu mittarfinnik ingerlatsinermut paasisimasaqarlualersimanerput tulluusimaarutigaarput, pisortaaneq Marie Fleishcer tusagassiuutinut nalunaarummi oqarpoq.
Mittarfinni helikopterinullu mittarfinni sulisulinni tamani kaffillertoqassaaq marlunngornermi 9. oktobari 2018 nal. 10.00-imit 16.00-ip tungaanut, innuttaasullu, sullitagut suleqatigullu tamarmik tikilluaqqusaapput.
Mittarfeqarfiit timmisartunut mittarfiit 13-it helikopterinullu mittarfiit katillugit 43-ut ingerlataraat, 450-illu missaannik sulisoqarluni nunatsinni suliffeqarfiit annersaasa ilaanniilluni.