timmisartup ajutoornera
Mittarfeqarfiit: Uani ajutoortoqarpoq
Ilulissani politiit qatserisartullu misissuleruttorpaat sooq timmisartoq minnermini ajutoornersoq
Ilulissat mittarfiata avannaata kangiani Air Greenlandip timmisartuisa ilaat Dash-8 minnermini ajutoorpoq, Mittarfeqarfiit nalunaarput.
Sooq timmisartoq ajutoornersoq misissorneqaleruttorpoq.
Annaassiniaanermut maleruaqqusaasut malillugit ajutoortoqarnermi iliuuseqartoqarpoq, maannakkullu politiit qatserisartullu paasiniarlugu aallartippaat suna pissutaalluni ajutoortoqarnersoq.
- Ilulissat mittarfianni suli misissuisoqarnera pissutaalluni annertunerusumik tusarliisinnaanngikkallarpugut, Mittarfeqarfiit nalunaarput.
Inuit sisamat timmisartumi ilaasorineqartut napparsimaviliaanneqarput.
Air Greenland pisoq pillugu ullup ingerlanerani tusagassiortunik katersortitsissaaq.
Timmisartumi inuit 15-it ilaasorineqarput, ilaqutaasut Kalaallit Nunaata Politiivinut oqarasuaat 36 52 46-mut sianeqquneqarput, politiit nalunaarput.