Mittarfeqarfiit siunissaat pillugu aalajangiinissaq kinguartinneqartoq
Aningaasaqarnikkut kinguneqaatissat misissoqqissaarneqarnissaat pisariaqartinneqartoq, Naalakkersuisup oqaatigaa.
Naalakkersuisut Mittarfeqarfiit siunissaannut siunnersuut upernaakkut ataatsimiinnermi suliarineqartussaagaluartoq kinguartissimavaat. Siunnersuut ukiakkut ataatsimiinnermi aatsaat suliarineqassasoq naatsorsuutigineqarpoq.
Inatsisissatut siunnersuutip kingunissaasa ilai suli aningaasaqarnikkut misissoqqissaarneqarlutillu naatsorsorneqartariaqarnerat kinguartitsinermut pissutaasoq, Ataaveqaasersuutinut Naalakkersuisoq Mariane Paviassen (IA) tusagassiorfinnut nalunaaruteqarluni ilisimatitsivoq.
- Pingaartumik Mittarfeqarfiit allanngortinneqassappat aningaasartuutissat kiffartuussinissamillu isumaqatigiissutissanut aningaasaqarnikkut kingunissaasa misissoqqissaarneqarnissaat pineqarput, nalunaarummi allassimavoq.
Akitsuutissat kiffartuusinissamillu isumaqatigiissutissat suliarineqartut
Inatsisissatut siunnersuut malillugu, Mittarfeqarfiit aktiaatileqatigiiffinngortinneqassaaq aamma Kalaallit Airports Holdingimut immikkoortortaqarfinngortinneqassaaq.
Inatsisissatut siunnersuummi politikkerit Mittarfeqarfiit siunissami aningaasaqarnerannik qanoq iluaqusiisinnaanerannik siunnersuuteqarpoq.
Nuummi Ilulissanilu timmisartoqarfissat nutaat atuutsinneqalerpata, ingerlatseqatigiiffik aningaasanik miliuunilikkaanik annaasaqassasoq naatsorsuutigineqarpoq, timmisartoqarfiimmi taakku Kalaallit Airports Internationalimit pigineqarlutillu ingerlanneqarmata.
Inatsisissatut siunnersuummi taamaammat oqaatigineqarpoq, timmisartunut ilaasunut tamanut akitsuusiinissamik kiisalu Namminersorlutik Oqartussanut kiffartuussinissamik isumaqatigiissutit aqqutigalugit nutaanik isaatitsiffiusinnaasunik periarfissaqartoq.
Sulisut toqqissillutik sulisinnaasut
Naalakkersuisup oqaatigaa, Mittarfeqarfimmi sulisut kinguartitsisoqarluartoq toqqissillutik sulinerminnik ingerlatsiinnarsinnaasut:
- Taamaakkaluartoq inatsisissatut siunnersuutip oqaluuserineqarnissaa 2022-mi ukiakkut ataatsimiinnissamut kinguartinneqarnera, Mittarfeqarfimmi sulisunut kingunissaqanngimmat ersarissassallugu uannut pingaaruteqarpoq, Mariane Paviasen oqarpoq, nangillunilu:
- Taamaattumik sulisut toqqissillutik suliinnarsinnaanerat oqaatigissallugu uannut pingaaruteqarpoq.
Narsarsuup mittarfiani pisortaasimasup Storch Lundip siusinnerusukkut Sermitsiaq.AG-mut oqaluttuarinikuuaa, Narsarsuup mittarfiani sulisut akornanni suliumajunnaartoqarsinnaasoq.
Storch Lund naapertorlugu, Naalakkersuisut ukiut tallimat tulliuttut Narsarsuarmi sulisutik sulisoriinnarniarunikkit, taava akissarsiat qaffanneqarnissaat imaluunniit inissiat akeqarunnaarnissaat sulisunit piumasarineqartut. Qaqortumi timmisartoqarfissaq naammassineqarpat tamanna Narsarsuarmut annertuumik kingunerluuteqassasoq naatsorsuutigineqarpoq.