Mittarfeqarfiit siunissaat aalajangiiffiginerqartoq - erngup nukinganik innaallagissiorfliornissamik siunnersuut aamma akuerineqarpoq
Mittarfeqarfiit aktiaatileqatigiiffinngortinneqassaaq Kalaallit Airportsimullu ilanngunneqassalluni. Inatsisartut tamanna marlunngornermi akuerivaat. Politikkkerittaaq inatsit, erngup nukinganik innaallagissiorfiliassamut Naalakkersuisut Danmarkimi aningaasaliisussarsiornissaannut periarfissiisoq akuerisimavaat.
Inatsisartut inatsisissatut siunnersuut Mittarfeqarfiit siunissaannut tunngassuteqartoq marlunngornermi akuerivaat. Ingerlatseqatigiiffik aktiaatileqatigiiffinngortinneqassaaq Kalaallit Airportsillu suliffeqarfissuanut (KAIR) ilanngunneqassalluni.
Nuummi, Ilulissani kiisalu Qaqortumi nutaanik timmisartoqarfiliornermut atatillugu tamanna pivoq. Timmisartoqarfiit pineqartut taakku KAIR-imit pigineqarlutillu ingerlanneqassapput, tamatumalu malitsigisaanik Mittarfeqarfiit aningaasaqarnerat ajorseriartinneqassalluni.
KAIR-imut ilanngunneqarneratigut ingerlatseqatigiiffiit taakku marluullutik sulisussanik unammilleqatigiinnginnissaat qulakkeerneqassaaq, aamma timmisartoqarfiit qulimiguulinnullu mittarfiit tamarmik suliffeqarfissuarmit ataatsimit ingerlanneqarnissaat qulakkeerneqassalluni.
Mittarfeqarfiit siunissami suliassanut ilisimasaqarluartunik siulersuisoqalerlutillu Namminersorlutik Oqartussanut kiffartuussinissamik isumaqatigiissuteqartassapput, tassa nunami maani timmisartoqarfiit qulimiguulinnullu mittarfiit ingerlanneqarnissaannut. Maannamut ingerlatsinermi Nuummi Kangerlussuarmilu timmisartoqarfiit ingerlanneqarnerannit sinneqartoorutigineqartartut timmisartoqarfiit allat qulimiguulinnullu mittarfiit ingerlanneqarnerannut atorneqartarput.
Naleraq akerliusoq: Akisuallaaqaaq
Pele Broberg Naleqqameersoq politikkerini kisiartaalluni siunnersuutip pingajussaanik suliarineqarneranut atatillugu oqaaseqartuuvoq. Naleqqamit siunnersuut akerlerineqarsimavoq, isumaqaramik timmisartoqarfiit nutaat ukiualunnguit qaangiuppata atuutsinneqalerpata Mittarfeqarfiit ingerlanneqarnerannit akisunerungaatsiartussatut isikkoqartut.
- Kingumut qivialaarutta takuneqarsinnaavoq, Mittarfeqarfiit kiffartuussinissamik isumaqatigiissutaannut ukiumut 35 millioner koruunit atorneqartarnissaat pilersaarutaagaluarpoq, kiffartuussinissamilli isumaqatigiissut inatsimmi allassimasoq 105 millioner koruuninik naleqarpoq. Tassa pingasoriaataat sinnerlugit akisunerulertussaavoq, Broberg oqarpoq.
Attaveqaasersuutinut Naalakkersuisoqarfimmit siusinnerusukkut ilisimatitsissutigineqarsimavoq, kiffartuussinissamik isumaqatigiissutissat nutaat naatsorsorneqarneranni, aningaasat Mittarfeqarfiit nunami qulimiguulinnut mittarfiit timmisartoqarfiillu aserfallatsaalineqarnissaannut kinguartoorutinik angummassinnaanngortinniarlugit ilanngunneqarsimasut.
Brobergi akerliugaluartoq inatsisissatut siunnersuut amerlanerussuteqartunit 26-iusunit akuerineqarpoq, pingasut akerliusut.
Naalakkersuisut erngup nukinganik innaallagissiorfiliassap aningaasalersorneqarnissaanik suliaqarnermik ingerlatsiinnarsinnaasut
Ullormut oqaluuserisassani aamma Utoqqarmiut Kangerluarsunnguanni erngup nukinganik innaallagissiorfiup allilerneqarnissaanik kiisalu Aasiannut Qasigiannguanullu pilersuisussamik innaallagissiorfiliornissamik siunnersuut suliarineqarpoq.
Inatsisissatut siunnersuut aqqutigalugu Naalakkersuisut Danmarkip naalagaaffianut aningaasaliisussarsiornissamut periarfissinneqarput kiisalu naatsorsuutigisamit 1,5 milliarder koruuninik akisunerusussaaneri akuerineqarlutik - tassa 3,8 aamma 4,6 milliarder koruunit akornanni akeqartussatut akuerineqarput.
Siunnersuut ilaasortanit 26-usunit akuerineqarpoq, akerliusoqaranilu.