Mittarfeqarfiit sipaarniarnerat suliffissanik pilersitsiffiusoq

Mittarfeqarfiit illoqarfinni mikinerusuni qulimiguulinnut mittarfiutaanni trafikassistentit atorunnaarlugit, namminersortut mittarfinni sulisussatut ilinniartittalerpaat.

Qulimiguulinnut suluusalinnullu mittarfinni sulisut maleruagassat atuuttut malillugit ilinniartinneqartarput. Tamatumalu eqquutsinneqarnissaa Air Greenlandimit Trafikstyrelsimillu qulakkeerneqartarpoq.

Illoqarfinni mikinerusuni qulimiguulinnut mittarfinni akuttusuunik ukiulluunniit ilaannaani tikinneqartartuni aningaasartuutit millisarniarlugit, Mittarfeqarfiit A/S namminersortunik isumaqatigiissuteqartarput. Namminersortut taakku qulimiguullip tikinnerani aallarneranilu assigiinngitsunik suliaqartinneqartarput.

Aviisi Sermitsiaq taama allappoq.

Taassuma saniatigut nunaqarfinni qulimiguulinnut mittarfiit ingerlanneqarnerat pillugu Mittarfeqarfiit KNI-mik isumaqatigiissuteqarpoq. Mittarfinni pineqartuni sulisut tamarmik ilinniartinneqartarlutillu pikkorissartinneqartarput, taakkulu sulilinnginnerini mittarfinni sulisinnaanerinut akuersissummik tunineqartarput. Taama Mittarfeqarfinni attaveqatigiinnermut pisortaq, Irene Jeppson oqarpoq. Mittarfinnilu siusinnerusukkut sulisimanngisaannartunik ilinniartitsisarneq pitsaasuusoq, sulisullu suliassaminnik pitsaasumik naammassinnittartut, qulimiguulinnut mittarfinni ulluinnarni aqutsisuusoq oqarpoq.

Isumannaatsumik ilinniartitsineq

- Qulimiguulinnut mittarfinni sulisugut pingaarutilerujussuarnik suliaqartarput. Ilaasunik, nassatanik, qulimiguullillu tikinnerani aallarneranilu suliaqarnissamut kiisalu allaffissornermut tunngasunik suliaqarnissamut sukumiisumik ilinniartinneqartarput.

- Timmisartumik angalanermi oqartussaasup, Trafikstyrelsip, Danmarkimi inissisimasup, Mittarfeqarfiit mittarfiutaasa aqunneqarnerat akuerisarpaa, taakkualu akuttunngitsumik mittarfinnik misissuisarput, Irene Jeppson oqarpoq.

Aviisimi Sermitsiami atuarnerusinnaavutit. Aviisi uani pissarsiariuk:

Powered by Labrador CMS