Mittarfeqarfiit aserfallatsaaliinermik suliat aalluppaat
Timmisartuussinerit akunnittarfinnilu unnuisut ikilineranni, sulisut 450-iusut aserfallatsaaliinermik suliaqarput, imaluunniit angerlarsimaffimminnit sulillutik, pisortaq ilisimatitsivoq.
Mittarfiit 13-it, heliportit 43-t akunnittarfiillu marluk Mittarfeqarfinnit ingerlanneqarput. Timmisartuussinerilli maanna amerlanngillat, akunnittarfinnilu unnuisut ikiliartorlutik, Mittarfeqarfiit pisortaa, Henrik Estrup Sermitsiaq.AG-mut mailikkut akissuteqarpoq.
Coronavirusip ajornartorsiortitsinera taamaatsitsivoq. Kalaallit Nunaatami iluani, avammullu timmisartuussinerit nalinginnaasut unitsinneqarallarput.
Henrik Estrup ilisimatitsivoq Mittarfeqarfiit sulisuminik soraarsitsisimanngitsoq.
Sinerissami paarlakaallutik sulipput
Nuummi qitiusumik allaffeqarfimmi sulisut ikittuinnaat allaffimmiipput, sulisut ilaat angerlarsimallutik sulinissamik piumaffigineqarsimapput. Sinerissamili allatut aaqqiisoqarpoq:
- Sinerissami tamarmik sulipput, ilaalli paarlakaallutik sulisariaqarlutik, Henrik Estrup oqarpoq itisiliillunilu:
- Suliassat sumiiffiit ilaanni unikaallatsinneqarsimapput, imaanngilarli suliassaaruttoqartoq. Aserfallatsaaliinermik suliaqartoqarpoq, sulisunillu ineriartortitsinissaq siunertaralugu oqaloqatiginnittoqarluni, allanillu suliaqartoqarluni.
Suliffeqarfiup pisut qanimut malinnaavigai:
- Ajornartoornerup qanoq sivisutiginissaa ilisimanngilarput, taamaammat siunissaq siulittoruminaappoq. Ataatsimiittarpugut, pisut qanimut malinnaavigaagut ullullu tamaasa nalilersuisarluta, pisortaq ilisimatitsivoq.