Mittarfeqarfiit: Angalanermi akiliut nikisinneqassanngilaq

Mittarfeqarfiit 2014-mi ingerlatsinikkut sinneqartooruteqalaaminerpoq.

Naak mittarfinni suliassaalatsittoqaraluarsimasoq, angallattut ikilisimagaluartut unnuisarfinnilu unnuisartut ikileriapiloorsimagaluartut sinneqartoortoqalaarpoq.

Sinneqartooruteqaminernermut peqqutaavoq suleriaatsinik pitsanngorsaasimaneq sunniuteqarluartumillu suleqatigiitsitsisoqalersimanera. Assersuutitut taaneqarsinnaavoq timmisartut qulaattartut aatsaat taama Mittarfeqarfinnuinnaanngitsoq Kalaallit Nunaannulli tamarmut iluaqutaasunik, aningaasatigut isaatitsissutaallualersimammata.

Mittarfeqarfiit tamanna tusagassiutinut nalunaarutigaat.

Sinneqartooruteqartarnissaq namminerisaminik Mittarfeqarfinnut anguniagaanngilaq taama oqarpoq pisortaq Jens Lauridsen:

- Mittarfeqarfinni aningaasaqarneq ima inisseqqasussaavoq aningaasaqarnikkut isertitat akiliutillu imminnut tulluarsarsimanerisigut qulakkeerneqartussaavoq mittarfinnik atuineq atuisutsinnut akikinnerpaaffimminiitinneqarsinnaanissaanut. Suliffeqarfitsinni piviusumi atukkatsinnut nalimmassaaleruttorpugut ukiunulli siuliinut naleqqiullugu aningaasat kaaviiaartut ikilissapput. Pitsanngorsaanerup kingunerisaanik aaliangiusimavarput akileraarutitigut 2015-mi 14-misulli inissisimaannassalluta.

Isertitaqaataanerpaanut ilaalluinnarpoq mittarfiup ammasarfiisa avataatigut timmisartunik qulaattoqarniartillugu ammatitsisarnigut minnissamut pisariaqartitsisoqalissagaluarpat piareersimatitaqarluta taakkulu Etopsinik ammatitsinernik taaguuteqarput.

Kalaallit Nunaata qulaani silaannaap qulaavaaneqarnerata nakkutiginerulernerata kingunerisaanik 2014-mi 10,5 million koruunit missaannik Mittarfeqarfiit iluanaaruteqarput ukiunut siuliinut naleqqiullugu.

Mittarfeqarfiit ukiumut naatsorsuutaat mit.gl-imi tamaat atuarneqarsinnaavoq.