Mittarfeqarfiit: Air Greenlandilu attavigiiginnavippugut

Sermitsiaq.AG-ip allaasererigiigatut Air Greenland Mittarfeqarfinnut pisuutitsiniarpalulluni tikkuartuivoq, timmisartoq Dash 8-eq Nuummi decembarip 29-ani sisoormat.

Ajutoorsimasoqartillugu misissuisartut misissuereerlutik utaqqiisaangallartumik inerniliussaanni nalunaarutigineqarpoq timmisartumi atortorissaarutit ilaanni ajoquteqartoqarsimasoq, taannalu qularnanngitsumik timmisartup mittarfiup sinaanut sisoorneranut pissutaasimasinnaasoq.

- Mittarfiup quasannerujussua annertuallaartumik isiginiaqqaarsimagipput oqaatigisinnaavara. Tamanna Mittarfeqarfinnut utoqqatsissutigisareerparput. Suleqatigiinnerput suli pitsassuuvoq. Suliamilu uani Mittarfeqarfiit akuulluarnerat nersualaarparput, Air Greenlandip pisortaanera Michael Højgaard Sermitsiaq.AG-imut sisamanngornermi nassuiaavoq.

Atuaruk: Misissuisartut nalunaarusiaasa naammassineqarnissaa Air Greenlandimit utaqqimaarneqarpoq

Atuaruk: Dash 8-p juullikkunni ajutoornera: Timmisartumi kukkunermik misissuisartut nassaartut

Kisianni Mittarfeqarfinnit Air Greenlandip sukkavallaangajattumik Mittarfeqarfinnut ajutoortoqarnerata kingorna pisuutitsiniartutut nipeqarsimanera oqaaseqarfigineqarusuppallaanngilaq.

- Qanoq isumaqarfigaasiuk Air Greenlandip Mittarfeqarfiit aallaqqaammut pisumut pisuutinniarlugit pissusilersornikuunera?

- Pisoq pillugu pisup ingerlanerani tamarmi qanittumik ammasumillu Air Greenland attaveqarfigaarput. Aamma tamatuma saniatigut Nuummi Mittarfik Mittarfeqarfiillu pitsaassutsimut immikkoortortaqarfia qanorpiaq pisoqarsimanera qulaajarniarlugu Ajutoornerit pillugit ataatsimiititaliarsuaq suleqatigaat, Mittarfeqarfinni tusagassiisarnermut pisortaq, Hans Henrik Lichtenberg Sermitsiaq.AG-mut taama allappoq.

Assit takukkit: Aana timmisartoq Nuummi saarlisoq

Atuaruk: Timmisartoq Nuummut minnermini saarlivoq

Maannalu ajutoorneq pillugu nalunaarusiaagallartup avammut saqqummiunneqareernerani Air Greenlandip Mittarfeqarfiit nersualaarniartutullusooq pivai. Tamanna qanoq isumaqarfigaasiuk?

- Pisumi matumanisut ittuni pisoq pillugu oqaaseqannginnissatsinnut politikkeqarpugut, tassami Ajutoornerit pillugit ataatsimiititaliarsuup tamanna inerniliiffigisussaavaa misissuini aallaavigalugit, Hans Henrik Lichtenberg Sermitsiaq.AG-mut allappoq, imalu nangilluni:

- Ajutoornerit pillugit ataatsimiititaliarsuup pisoq pillugu eqqorneqartut tamaasa kiisalu atortut misissuiffiginissaat suliassaraa, taamaalilluni misissuinerminnik inerniliinerat pisumut inaarutaasumik nalunaarusiaasarpoq.

Ajutoornerit pillugit ataatsimiititaliarsuup nalunaarusiarigallagaa tuluttooq uani atuaruk