Mittarfeqarfiit 2021-mi januaarip aallaqqaataani kattussinnaapput
Naalakkersuisut annertuumik ingerlatsinerup inuiaqatigiinnut iluanaarutaanerpaanissaa anguniarlugu suleqatigiissitanik pilersitsisimapput, suleqatigiissitat timmisartuutileqatigiiffiit maanna pingasuusut qanoq ikilisinneqarsinnaanerat pillugu pilersaarusiussapput
Kalaallit Nunaat ullumikkut assigiinngitsunik pingasunik timmisartuutileqatigiiffeqarpoq: Mittarfeqarfiit, KAIR International aamma KAIR Domestic.
- Mittarfeqarfiit KAIR Domesticilu 2021-mi januaarip aallaqqaataani kattussinnaapput. Matumani suliffeqarfiit pisariaqartinneqartumik piareersarnissaannut piffissaqartinniarlugit, Naalakkersuisut suliakkiutaanni sulinissamut pilersaarummi taamatut allassimasoqarpoq.
Sanaatornermi ingerlatsinermilu ilisimasat agguataarneqarnerat Ekspertise fordelt på anlæg og drift
Sermitsiaq.AG ”Siunissami Kalaallit Nunaanni mittarfinni ingerlatsinerup aaqqissuussaanissaa pillugu suleqatigiissitaliamut suliakkiissutinut najoqqutassaq” pillugu allagaammik takunnissimavoq, pineqartumilu naatsorsuutigineqarpoq, ”KAIR-p Mittarfeqarfiillu suleqatigiilluarnerisigut naatsorsuutigineqartoq, Nuummi, Ilulissani Qaqortumilu timmisartoqarfissat pilersaarusiorneranni sunniiveqatigiittoqarnissaa”.
- KAIR sanaartornermi pisariaqartinneqartumik ilisimasaqarpoq, Mittarfeqarfiillu timmisartoqarfinnik ingerlatsinermi pisariaqartinneqartumik ilisimasaqarlutik. Ineqarnermut, Attaveqaatinullu Naalakkersuisoqarfiup, Mittarfeqarfiit aamma KAIR-ip oqaloqatigiinnerisigut paasinarsisisimavoq, mittarfinnik ingerlatsinerit ullumikkut sanilliullugu mittarfinnut ikinnerusunut kattussinermi iluaqutaasinnaasunik, ajoqutaasinnaasunik aaqqissuussaasinnaasunillu erseqqissaasoqarnissaanik kissaateqarneq, pineqartumi allassimavoq.
KAIR Domestic ingerlatseqatigiiffittut ingerlaannassasoq
- KAIR-imi piginnittuunerup aaqqissuussaanera eqqarsaatigalugu, tassa naalagaafik KAIR Internationalip 33%-ianik piginnittuunera eqqarsaatigalugu, Mittarfeqarfiit pigisai nalillit suliarisartagaasalu KAIR Domisticimut ilanngunneqarnissaat siunertamut naapertuussorineqarpoq, suliassanut nassuiaatini taamak allassimasoqarpoq.
Misissueqqissaarnermi Kangerlussuup Narsarsuullu siunissai pillugit inerniliussat, taakkulu malitsigisaannik timmisartoqarfiit pillugit pilersaarutit, kiisalu suliassat allat timmisartoqarfinnut attuumassuteqanngitsut, Mittarfeqarfiit ullumikut suliarisartagaat ilanngunneqassapput.
Suliassat tigussaasut
Suleqatigiissitat suliassat makku misissussavaat:
Tiimisartoqarfiit ataasiakkaat, ullumikkut Mittarfeqarfinnit ingerlanneqartut, ingerlatsinermi aningaasartuutaasa aningaasaliiffigineqaqqinnissamillu pisariaqartitaasa naatsorsorneqarnerat, tassani kiffartuussinissamut isumaqatigiissutit naammattumik akilerneqarnissaat siunertaralugu.
Mittarfeqarfiit Kangerlussuarmi Narsarsuarmilu iniutaasa takussutissartaat. Sorliit sulisunut inissiaappat, suliffiit allallu suuppat; aamma suut kommuninut nuunneqassappat aamma qaqugu.
Suliassat timmisartoqarfinnut attuumassuteqanngitsut, soorlu aqqusinernik aputaajaasarneq, innaallagissiorfimmik il.il. ingerlatsineq, kommunimut Nukissiorfinnulluunniit qanoq qaqugulu nuunneqarnissaannut pilersaarut. Suliassat taakku isumagineqarnissaannut KAIR Domistic kiffartuussinissamut isumaqatigiissuteqarfigineqarnissaanut pilersaarusortoqarsinnaavoq.
Nuummi Ilulissanilu timmisartoqarfiit ETOPS lufthavnit pillugit suliassanik tigusisinnaanerannik qulaajaaneq.
Suleqatigiissitat Naalakkersuisut Siulittaasuata Naalakkersuisoqarfiani, Aningaasaqarnermut Naalakkersuisoqarfimmi aamma Attaveqaatinut Naalakkersuisoqarfimmi atorfilittanit inuttaqarput, kingullertut taaneqartoq suleqatigiissitani siulittaasuussaaq. Aamma Kalaallit Airports Holding A/S Mittarfeqarfiillu suleqatigiissitani peqataatitaqassapput.