Mitit napittarnerat piniarneqarnerinit sunniuteqarneruvoq
Nipisanniarnermi mitit napittoorneqarajuttarput, nunatsinnilu miterniartarnermit aalisarneq mitit amerlassusaannut sunniuteqarnerusartoq, ilisimatusartut inerniliipput.
Mitit napinneqartarnerisa piffissaq ungasinnerusoq eqqarsaatigalugu nunatsinni nipisaat suaannik MSC-mik nalunaaqutsersuineq aarlerinartorsiortissinnaavaa, taamaammallu aalisarneq timmiaqassutsimut qanoq sunniuteqartarnersoq qulaajarniarneqarpoq.
MSC-mimmi nalunaarsuinermi aalisarnermi saniatigut napittoqartarnerata nakkutiginissaanut ilaavoq.
Ilisimatusartut 2019-imi aamma 2020-mi nipisanniarnermi napittoortarnerit kisippaat, inernerilu ilisimatuussutsikkut allaaserisami saqqummiunneqarput.
Mitit napittoorneqartut Kalaallit Nunaanni piniarnermi nalunaarutigineqartartunit pingasoriaammik amerlanerussasut, ilisimatusartut inerniliuppaat, kiisalu napittoortarnerit amerlassusaannut sunniuteqartartut:
Amerliartorsinnaassusaannut sunniuteqartartut
- Kalaallit Nunatta Kitaani mitit amerliartorsinnaanerigaluat saniatigooralugu pisaqartarnerit 50%ip missaannik amerlatigisunik ikilisinneqartarput. Assersuutigalugulu ukiumut mitit 16.500it missaannik amerlassuseqartunik piniartoqarnerata mitit ikilisereerneqartarput, tassa amerliartornissaasa 30%iisa missaannik amerlassuseqartut pisarineqareertarput, Pinngortitaleriffik ilisimatusarneq pillugu nittartakkamini taama allappoq.
Qassutinut napittartut arnaviaanerullutillu piaqqiorsinnaanerusarmata, piniarnermi utoqqaannginnerusut pinarneqarnerusarmata, saniatigooralugu pisarineqartartut amerlassusaannut sunniuteqartarnerat pissutaatinneqarpoq. .
- Saniatigooralugu pisaqartarneq aamma ukiumik aniguisimareersuni pisaqarfiunerusarpoq, nalinginnaasumik peqquteqarlutik toqusartoqartarnerata piniarneqareernerisalu qaangiutereerfianni, Pinngortitaleriffik allappoq.
Aalisarnerup kinguartinneqarnissaa siunnersuutigineqartoq
Saniatigooralugu mitit napittoortarnerat Kalaallit Nunaata kujataata kitaani amerlassusaannut sunniuteqarnerusartoq, ilisimatusartut misissuinerminni inerniliuppaat, saniatigooralugulu pisaqartarneq piujuartitsiffiunngitsutut nalilerlugu.
Ilisimatusartut oqarnerat naapertorlugu, nipisanniarnerup aallartinnerata kinguartinneqarnissaa aaqqiissutaasinnaavoq.
Saniatigooralugu pisarineqartartut 2019-imi amerlanerujussuusut, misissuinermi takuneqarsinnaavoq, tassanilu aalisarneq 2020-mit sivisuneruvoq.
Qassutinik nutaanik saniatigooralugu pisaqartarnermik pinngitsoortitsisinnaasunik ineriartortitsisoqanngippat, aalisarnerup matuneqartarnissaanik ilisimatusartut aamma siunnersuuteqarput.