Missingiut nutaaq: Aningaasaqarneq "taamaallaat" 1,5 procentimik ajorseriassaaq
Aningaasaqarnermut Siunnersuisoqatigiit upernaakkut nalunaarusiaminni nalilerpaat, Kalaallit Nunaanni BNP 3-miit 7,4 procentimut ajorseriartussatut siusinnerusukkut nalilerneqarsimagaluartoq maanna 1,5 procentimik ajorseriassasoq.
Aningaasaqarnermut Siunnersuisoqatigiit coronap ajornartorsiortitsinera pissutigalugu immikkut ittumik upernaakkut nalunaarusiorsimapput, tassa ajornartorsiornerup nunap aningaasaqarneranut kingunerisinnaasai nalilerniarneqarlutik.
Nalunaarusiaq maanna naammassineqarsimalerpoq, siunnersuisoqatigiillu aningaasaqarnerup qanoq ajortigisumik ingerlalernissaanut naatsorsuutitik annikillisimavaat.
Siunnersuisoqatigiit apriilip qaammataani allakkiaminni naatsorsuutigisimavaat, Kalaallit Nunaanni 2020-mi BNP 3,0 procent angullugu ajorseriassasoq, ajornerpaamillu pisoqassappat 7,4 procentimik ajorseriassasoq.
Kisitsisit nutaat atorneqarsimasut
Aningaasaqarnermut Siunnersuisoqatigiit nutaamik nalilersuiniarlutik ilaatigut Grønlandsbankenimiit, Nukissiorfinnit Polar Oilimillu kisitsisit kingulliit pissarsiarineqarsinnaasut pissarsiarisimavaaat.
Missingiinerullu nutaap takutippaa, taamak ajortigisumik kinguneqarniarpasinngitsoq:
- Ataatsimut isigalugit akit nikerarnerisa takutippaat, suliat (BNP) ataatsimut isigalugit 2020-mi 1,5 procentimik ajorseriarsinnaasut, siunnersuisoqatigiit allapput.
Aningaasaqarneq 2021-mi 4,8 procentimik pitsanngoriarsinnaasoq
Qanorli ingerlasoqarnissaanut apeqqutaalluinarpoq, ukiamut nunarsuarmi aningaasaqarnermut ajoquseeqqittumik tuniluuttoqaqqilissanersoq. Tamanna pissappat, siunnersuisoqatigiinnit naatsorsuutigineqarpoq, BNP-p 2020-mi tre aamma fire procentit akornanni ajorseriassasoq.
Matooraatitseqqittumik tuniluuttoqaqqilissanngippat, Kalaallit Nunaata aningaasaqarnera 2021-mi iluarsiartoqqqilersinnaasoq siunnersuisoqatigiinnit naatsorsuutigineqarpoq.
Tassunga atatillugu siunnersuisoqatigiit missingiipput, BNP 4,8 procentimik pitsanngoriassasoq.
Sunniuteqarnissaa pinngitsoorneqarsinnaanngitsoq
Aningaasaqarnermut Siunnersuisoqatigiit 2021-mi ingerlalluartoqarnissaanik siulittuigaluarlutik erseqqissaatigaat ajornartorsiut ilungersunartuusoq, ilaatigut nunarsuarmi aningaasaqarnerup ajorseriarujussuarnissaanik naatsorsuuteqarneq pissutigalugu.
- Coronap ajornartorsiortitsinerata malitsigisaanik ukiut suliffissaqartitsinerulersitsillutik aningaasaqarnikkut ingerlalluarfiusimasut allanngorput. Suliffissat ikilinissaat nunattalu karsianut malunnaatilimmik sunniuteqarnissaat pinngitsoortinneqarsinnaanngillat. Ukiuni aggesuni aningaasaqarnikkut ingerlatsinissamut atugassarititaasut periarfissallu sunnerneqassapput, Aningaasaqarnermut Siunnersuisoqatigiit allapput.