Missingiineq: Sapaatip akunneranut 35 tiimit sulisoqartalissappat 462 mio. koruuninik naleqassaaq

Sapaatip akunneranut sulisarneq 40 tiiminiit 35 tiiminut appartinneqartuuppat Namminersorlutik Oqartussanut akisussaaq, Naalakkersuisut Anna Wangenheimimut akissutaanni atuarneqarsinnaavoq

Demokraatineersup Anna Wangenheimip arlalinnik apeqquteqarnermigut paaserusussimavaa, nunami maani piffissap suliffiusartup annikillisinneqarnera inuiaqatigiit aningaasaqarnerannut qanoq kinguneqassanersoq.

Wangenheimimit ernummatigineqarpoq, Kalaallit Nunaanni nunanut allanut sanilliullugu napparsimallutik sulinngittoortartut amerlanerusannguatsiarnerat. Ajornartorsiut, polikkeri taanna naapertorlugu, piffissap suliffiusartup sivikillisinneqarneratigut imaluunniit sulinerup nalaani sulisitsisup akiligaanik timigissartoqartarneratigut immaqa pinaveersaartinneqarsinnaasoq.

Aningaasaqarnermut Naalakkersuisup Vittus Qujaukitsup oqaatigaa, piffissap suliffiusartup inatsisiliornikkut appartinneqarnera, Kalaallit Nunaanni sulffeqarnerup aaqqissugaanera malillugu suliffeqarnermi illuatungiinnit isumaqatigiissutigineqartartoq saneqqunneqassasoq.

46 mio. koruunit nalingannut nal. ak. affaani timigissarneq

Tamatuma saniatigut piffissaq suliffiusartoq appartinneqarpat akisussaaq, Qujaukitsoq Anna Wangenheimimut akissuteqarnermini ilisimatitsivoq.

Aningaasartuutissat imatut nalilersorneqarput:

Pisortat suliffeqarfiini sapaatip akunneranut piffissap suliffiusup nalunaaquttap akunnerinit 40-nit 35-nut appartinneqarnera: 462 mio. koruunit missaat

Pisortat suliffeqarfiini sapaatip akunneranut piffissap suliffiusup nalunaaquttap akunnerinit 40-nit 32-nut appartinneqamera: 740 mio. koruunit missaat

Sulinerup nalaani minutsini 30-ni timigissartarnermik atulersitsinermi pisortat suliffeqarfiini aningasarsiatigut 46 mio. koruunit missaannik akeqassaaq.

- Taakkulu saniatigut sulisut ineqartinneqarnerannut, allaffinnik inissat, aningaasartuutilIu alIat sulisut amerlineqarnerannut attuumassuteqartut, piffissamut inoqanngiffiusussamut tunisassiorfiusussaanngitsumulluunniit matussutissanut nalunaaquttap akunneri suliffiusussat, qaavatigut aningaasartuutigineqassapput, Qujaukitsoq naatsorsuinerit ilimagisatut najoqqutassatullu isigineqartariaqarnerannik erseqqissaasoq allappoq.

Taamattaarlu sulinerup nalaani timigissartamermik atulersitsineq namminersorlutik inuussutissarsiutilinnut taamaaliornissap nalorninartoqarnera pissutigalugu qanoq akeqassanersoq naatsorsorneqanngilaq, ilisimatitsissutigineqarpoq.

Naalakkersuisoqarfiullu naatsorsuinermini ilimagaa, aningaasarsiat tunisassiornerlu allannguuteqassanngitsut.

Sulinerulernermi iluanaarutissat

Akerlianik piffissaq suliffiusartoq sivitsorneqartuuppat, inuiaqatigiit aningaasaqarnerannut iluanaarutigineqassapput:

Pisortat suliffeqarfiini sapaatip akunneranut piffissap suliffiusup nalunaaquttap akunnerinit 40-nit 42-nut sivitsorneqarnera: 185 mio. koruunit missaat

Pisortat suliffeqarfiini sapaatip akunneranut piffissap suliffiusup nalunaaquttap akunnerinit 40-nit 45-nut sivitsorneqarnera: 462 mio. koruunit missaat

Sulisulli nalunaaquttap akunnerini amerlanerusuni sulisarnerminni aningaasarsiaqarnerulissappata, taakkua iluanaarutinit ilanngaatigineqartariaqassapput, akissuteqaamma allassimavoq.

Powered by Labrador CMS