Skip to main content

Missingersuutit isumaqatiginninniutigineqartut: Qeqqata Kommuniani sipaarutaasinnaasut 88 mio. kr.-t nassaarineqarput

Missingersuutit siullermik aappassaanillu isumaqatiginninniutigineqarnerisa akornanni sipaarutaasinnaasunik nassaartoqarneratigut 12 millioner koruuninik sinneqartooruteqartoqassaaq. Sulili amerlanerusunik sipaaruteqartoqassasoq oqaatgineqarluni.

Qeqqata Kommuniani kommunalbestyrelsi kommunip aappaagu pitsaanerusumik aningaasaqarnissaa anguniarlugu sipaarutaasinnaasunik qaammammi kingullermi misissuisimavoq.

Kommunimit paasineqarmat ataatsimiititaliat atuinertik annikillisinngippassuk sinneqartoorutaasussat 226.000 koruuniinnanngortussaasut, 2023-mut ukiunullu tulliuttunut missingersuutini sinneqartoorutissat pitsaanerulersinniarlugit sipaarutissanik ujaasisoqarsimavoq. Kommunip 226.000 koruuninik sinneqartooruteqarniarnerata naammannginneranut pissutaavoq, naatsorsuutiginngisamik aningaasartuuteqartoqarsinnaanera.

Ataatsimiititaliat ingerlatsiviillu sapaatip-akunnerini kingullerni sisamani sipaarutaasinnaasunik nassaarsimanerisigut kommuni ukiuni tulliuttuni sisamani 90 millioner koruunit missaanniittunik sipaaruteqassaaq. Taakkuli naammanngilluinnarput:

- 2023-mut missingersuutit ukiunullu missiliuteqarfiusut 2024-mit 2026 tikillugu 87,9 mio. koruuninik sinneqartoorfiussapput (ukiumut 22 mio. koruuninik), taakkulu sanaartornermut immikkoortumi kommunip suliaqarfiinut tunngatillugu atuilluartuunerunani. Taamaattumik sipaarutissanik aammalu/imaluunniit isertitaqarfissanik amerlanerusunik nassaartoqarnissaa pisariaqartutut nalilerneqarpoq, taamaalilluni kommunip aningaasanik atoriaannaateqarnera annertusineqassalluni, kommunalbestyrelsip 2023-mut missingersuutissanik aappassaanik suliarinninnissaanut suliassamik saqqummiussissummi allassimavoq.

Ingerlatsinermi aningaasartuutit qaffakkaluttuinnartut

Kommunip allaffeqarfianit nalilerneqarpoq, kommunip akiliisinnaassuseqarluarnera pissutigalugu kommunip aningaasaqarnera naammaginartuusoq. Suliassamik saqqummiussissut naapertorlugu kommuni novembarip arfineq-pingajuani tigoriaannarnik 215.065.500 koruuninik aningaasaateqarpoq.

- Kommunilli ingerlatsinermut aningaasartuutaassa qaffakkaluttuinnarnerat ernumanartoq, allaffeqarfimmit oqaatigineqarpoq, nangillunilu oqaatigineqarluni:

- Ilutigitillugu kissaataasoq tassaavoq, siunissami ingerlatsiffissanik nutaanik ineriartortitsinerit pitsanngorsaanermit aammalu immikkoortortat ataasiakkaat iluanni nuussinikkut aningaasalersorneqarnerusarnissaat.

Iliuusissat arlallit

Kommunalbestyrelsip 2023-mut missingersuutit sisamanngornermi aappassaanik suliarivai. Kommunilu sipaarutaasinnaasunik nassaarniarsimavoq, ilaatigut ulluunerani paaqqinnittarfinniititaqarnermut akiliutigineqartartoq 10 procentimik qaffanneqassanersoq aalajangiiffigineqartussaalluni. Kommuni taamaalilluni 2023-mi ukiunilu missingersuusiorfiusuni tulliuttuni ingerlatsinermi immikkut 600.000 koruuninik isertitaqarsinnaalissalluni. Aningaasaqarnermut Ataatsimiititaliap sulliaq suliarisimavaa akuersissutigalugu.

Tamatuma saniatigut ilaatigut aalajangiunneqarsimavoq, atuarfimmi nerisaqartitsisarneq meeqqanut pissakinnerusuinnarnut atuutsinneqartalissasoq, tassani 2.200.000 koruunit sipaarutigineqassallutik.

Ilanngullugu sisamanngornermi ataatsimiittoqarmat siunnersuutigineqarsimavoq, Sisimiuni Maniitsumilu ingerlatsinermi ukiumi missingersuuteqarfiusumi 2022-mi ukiullu tulliini katillugit 1,4 millioner koruuninik sipaaruteqartoqassasoq, aamma aningaasarsianut ingerlatsinermullu suli sipaaruteqartoqassasoq.

Qeqqata Kommuniani missingersuutit pillugit isumaqatiginninniarnerit naammassineqarsimapput, sapaatillu-akunnerata siulitani kommunalbestyrelsimit akuerineqarlutik.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER