Missingersuutit isumaqatiginninniutigineqartut: Avannaani sipaaruteqartoqassasoq

Avannaata Kommuniani kommunalbestyrelsi ataatsimiititaliallu sipaaruteqarfiusinnaasunik misissuileruttorput. Kommunimi ataatsimiititaliat susassaqarfimminni, aappaagu missingersuutissani katillugit 71,8 millioner koruuninik sipaaruteqartoqartussaammat kommunalbestyrelsimi novembarip 25-ani aappassaanik suliaqartoqarlunilu akuersissuteqartoqannginnerani, sipaaruteqarfiusinnaasunik suliassanilluunniit kinguartinneqarsinnaasunik ujaasisussanngorput.

Avannaata Kommuniani kommunalbestyrelsip ataatsimiissimaneranit imaqarniliami taamatut allassimasoqarpoq. Kommunalbestyrelsiip kommunip 2023-mut missingersuusiai oktobarip arfineq-aappaanni siullermeerlugit suliarai.

Maannakkumiit sipaaruteqartoqassasoq

2023-mut missingersuusiani takuneqarsinnaavoq, kommuni allannguisoqanngippat amigartooruteqassasoq:

- Taamaasilluni ingerlatsinermut, sanaartoornermut aammalu nikeraartaasut ilanngullugit amigartooruteqartussatut 69,0 millioner koruuninik inerneqarpoq. Tamatumalu kinguneranik missingersuuserisarnermut naatsorsuuserisarnermullu inatsit malinneqarani, kommunalbestyrelsip ataatsimiinnissaanut suliassamik saqqummiussissummi aningaasaqarnermut kinguneqaatissat pillugit allassimasoqarpoq.

Peqatigitillugu missingersuutini takuneqarsinnavoq, kommuni akiliisinnaassutsimigut 71,8 millioner koruuninik amigartooruteqassasoq.

- Taamatuttaarlu ukioq manna suut aningaasaliissutitigut sipaarutaasinnaanersut paasiniarlugu maannangaaq suliaqartoqasasoq. Siullermeerinninnerummi takutippaa aappassaaneerinninnermi missingersuusioqqinnissamut minnerpaamik 71,8 millioner koruunit ujartortariaqassallutik, imaqarniliami allassimavoq.

Ukioq manna akileraarutitigut isertitakinnerusoqassasoq

Kommuni missingersuutitigut minnerpaamik amigartooruteqaranilu sinneqartoorutqartussaanngilaq, kommunili missingersuusiornermi naatsorsuusiornermilu inatsit malillugu sapinngisamik sinneqartooruteqarniartussaavoq.

Aningaasaqarnermut Naalakkersuisoqarfiup 2022-mi septembarip qaammataani Avannaata Kommunianut ilisimatitsissutigisimavaa, kommunip missingersuutinut sinaakkutaannut, tassunga ilanngullugit ingerlatsinermut, tapiissutinut sanaartornermullu atugassaat 994,5 millioner koruuniniit 1.006,3 millioner koruuninut qaffanneqarsimasut, kommunip 2021-mi juulip aallaqqaataaniit atuutilersumik siusinaartumik pensionisialinnut aningaasasrtuutaasa allannguutai matussuserniarlugit.

Kommunimullu ajoraluartumik akileraartarnermut aqutsisoqarfik nalunaarsimavoq, kommunimit akileraarutitigut isertitakinnerunissaq naatsorsuutigineqassasoq.

- Isertitassatillugu missingerneqartuni akileraartarnermut pisortaqarfimmiik nalunaarutaasoq malillugu ukioq kingullermut sanilliullugu akileraarutitigut isertitassat 53,09 millioner koruuninik annikinnerullutik.

Akileraarutitigut isertitakinnerusoqaraangat missingersuutitigut amigartooruteqarnerusoqartarpoq.

Kommunalbestyrelsip kommunip missingersuutai novembarip 25-ani aappassaaneerlugit suliarissavai.