Missingersuut: Innuttaasut ikinnerulissapput
Kalaallit Nunaanni innuttaasut ikiliartornissaat missingersuutigineqarpoq. Ukiuni tulliuttuni qulini innuttaasut 2,8 procentimik ikileriarnissaat naatsorsuutigineqarpoq, innuttaasut 2018-mi 55.877-init 2028-mi 54.400-nik inoqarnissaa naatsorsuutigineqarluni.
Innuttaasut ikinnerulernissaat naatsorsuutigineqarpoq, aammali innuttaasut akornanni 65-it qaangerlugit ukiullit 2030-ikkunni amerlatserujussuarnissaat naatsorsuutigineqarpoq.
2048-mi 45-nit 54-inut ukiullit ullumikkumit 30 procentimik ikinnerunissaat naatsorsuutaavoq. Ukiuni 30-ni tulliuttuni innuttaasut 15 procentimik ikileriarsimanissaat naatsorsuutaavoq, maanna 55.877-init 2048-mi 48.000-inut.
- Ukiut qulit 15-illu matuma siornarnit arnat meeqqiorsinnaasut ikinnerulissammata ukiuni tulliuttuni amerlasuuni ikinnerusunik meeqqiortoqarnissaa naatsorsuutigineqarpoq. Ukiumullu toqusut amerlanerusarnissaat ilimagineqarmat inunngortartut toqusunit ikinnerunissaat naatsorsuutigineqarpoq, Naatsorsueqqissaartarfik allappoq.
- 65-it sinnerlugit ukiullit amerlinissaat ilimagineqaraluartoq 65-it sinnerlugit ukiullit ukioqqortusinerullutik toqusartut amerlinissaat ilimagineqarmat, qanoq amerlatigilernissaat nalorninarpoq. Taamaattumik 65-it sinnerlugit ukiullit maannamut toqusartut ukiui aamma malillugit naatsorsuisoqarpoq. Inuit utoqqaanerulerlutik toqusarnissaat naatsorsuutigalugu misissuinermi naatsorsuineq malillugu ukiut qulit qaangiuppata Kalaallit Nunaanni inuit 65-it sinnerlugit ukiullit 6.950-it najugaqassapput, toqusut ukiui allanngunngippata 65-it sinnerlugit ukiullit 6.221-iussapput, ilisimatitsissutigineqarpoq.
Inunngortartut amerlanerunerat (inunngortut toqusunik ilanngarlugit) naatsorsuiffiup nalaani ikilissapput.
- Ukiut kingulliit qulit ingerlanerini Kalaallit Nunaannut aamma Kalaallit Nunaannit nuuttartut assigalugit taamaaginnassappata, tassa ukiumut 400-it missaat Kalaallit Nunaannit nuuttaannassappata innuttaasut ikilissapput. Nuuttartut inunngortartut amerlanerunerannik ilanngaraanni inuit Kalaallit Nunaanni najugaqartut ikilisussaassapput.
Inuit amerlanngitsut tunngavigalugit inuit amerlassusissaannik naatsorsuinerni naatsorsuutit inerneri, inuit amerlasuut tunngavigalugit naatsorsuinernit nalinginnaasumik nalorninartoqarnerusarput. Ukiut ikinnerusut siumut isigigaanni (ukiut ataatsimiit tallimanut), siunissamik naatsorsuineerarpassuarnik ilaqanngikkaangamik eqqoriaalluarnerusarput.