Miss Universe nunatsinnut takkuteqqilersoq

Miss Universe Denmarkimik aaqqissuisut nutaat aasariartornerani pilersaarusiungaatsiarsimapput, tamannalu Kalaallit Nunaannut tulluusimaarutissaalluartumik inerneqarpoq.

Suummi tamarmik pilersaarutit malillugit ingerlappata aappaagu Miss Universemik namminerisatsinnik unammisitsisussanngorunarpugut.

Miss Universe Greenland pillugu siornatigut allaaserisat tamaasa atuakkit

Pinnersaasartoq Nuummeersoq Aviaaja Hammeken Schultz naalagaaffeqatigiinnermeersut allat aqqanillit peqatigalugit Miss Universe Denmarkimit nalileeqataasussatut aallaqqaammut toqqarneqarpoq.

Pinnerneqqusaanneq pinnissutsimut tunngasuinnaanngitsoq siusinnerusukkut allaaserisatsitut Københavnimi aggustip 15-iani ingerlanneqassaaq, tamatumuunalu naliliisut akornanni kalaallimik peqataasoqarluni.

Ineriartorneq sukkasooq

- Kalaallit Nunaat sinnerlugu peqataavunga tamatumalu peqatigisaanik nunarput nittarsaallugu. Suna tamarmi sukkasoorujussuarmik ingerlammat avataaniit tapiiffigineqanngilanga Danmarkiliarnissamullu bilitsi nammineerlunga isumagisimallugu, pinnersaasartoq tusagassiorfinnut nalunaarummi allappoq.

- Danmarkimi ukioq manna unammisitsinermut Miss Greenlandimik peqataatitsinissamut ajoraluartumik naammattunik aningaasaliisussaqarsimanngilagut, aappaaguli Miss Greenlandimik aaqqissuussinermik isumaginnittuussaanga, taamaattumik pissanganassaaq.

Aviaaja Hammeken Schultz suliniutit arlallit akornanni assilisittartunik ilisarnaammik Inuit Modelsimik taaguutilimmik aallartitsisimavoq.

- Nivissat Miss Greenlandimut qinnuteqartut siunissami Inuit Modelsinut ilaalissapput, tamatumanilu Inuit Models aamma Miss Universe Denmark suleqatigiipput.

Pinnerneqqusaannermi 26-t sinneruttut

Pinnersaasartoq pinnerneqqusaannermilu naliliisartoq Københavniliassaaq pingasunngornermi aggustip 12-ani Miss Universemillu pinnerneqqusaannermut Bella Skymi aggustip 15-iani ingerlanneqartussamut peqataassalluni.

Arnat 300-t sinneqartut Danmarkimit tamarmeersut Miss Universe Denmarkimut peqataaniarlutik marsimiilli nalunaarsimapput. Peqataasut pinnernerpaanu 50-inut ikilisinneqarput maannalu 26-nut ikilisinneqarsimallutik.

Peqataasut sakkortuumik sungiusarsimapput ilorlikkut qallikkullu pinnissuseq samminerullugu:

Peqataasut aallaqqaammut ataasiakkaarlutik naliliisartunit apeqqarissaarfigineqassapput, tamatumalu kingorna naluuseqarlutik inooriaatsimi timigissarsimanermilu unammissallutik, unnussiummik kjolilerlutik timikkut isikkumi, sassarternermi pinnissutsimilu, naggataatigullu nivissat scenemi apeqqutinik akissuteqassallutik.

Unnukkut nalileeqataasussat tassaapput atisat mutit silarsuaanni Danmarkimi nunanilu tamalaani inuit nuimasut tassaallutillu:

• Lindsay Becker - Miss U.S. International 2015
• Laila Av Reyni – Atisanik ilusilersuisartoq erinarsortartorlu Savalimmiuneersut
• Mai Manniche – Pinnersaatinik ilusilerrsuisartoq JEWLSCPH-imeersoq
• Maria Hirse – Miss Universe Denmark 1993 tv-iimilu saqqummiussisartoq
• Marco Merie – Nujalerisoq GOLD Professional Haircaremillu pilersitsisoq
• Anja Ekstrøm – Assiliisartoq
• Marie Louise Brangstrup Schmidt – Naluusinik ilusilersuisartoq North.DK-meersoq
• Sabrina Pagh – Pagh Blomsterimik piginnittoq ”Blomster til Stjernerne”-milu peqataasussaq
• Signe Bruun – Tarngutit pinnersaatitiluanni ilinniartitaanermut pisortaq
• Caroline Brent – Danmarkimi Benefit Cosmeticimeersoq
• Andreas Firlings – Eqqumiitsuliortoq
• Aviaaja Hammeken Schultz – Inuit Models Agent/Miss Greenland Director