Misissukkanut akissutit: Tunillatsittoqarsimanngilaq

Nunatsinni Nakorsaaneqarfiup coronamut tunngatillugu misissukkat akissutaat 39-t tigusimavai, taakkulu tamarmik tunillatsissimanngillat.

Ullut aqqanilissaat Kalaallit Nunaanni tunillatsittoqarsimanngilaq.

Nunatsinni Nakorsaaneqarfiup naatsorsuisimanerata kingulliup nittartakkamigut saqqummiusimasaata tamanna takutippaa.

Ippassaq 942-t misissorneqarsimapput, ullumilu 978-it misissorneqarsimallutik, taakkunannga 937-t akissutissarsineqareerput. Nunatsinni Nakorsaanerup misissukkat 41-t akissutissaat suli pissarsiarinngilai.

Kommuneqarfik Sermersuumi inuit 757-it coronamut misissortissimapput, nunap sinnerani inuit 221-t misissortissimasut. Nunatsinni Nakorsaaneqarfiup nittartakkamini kommunini ataasiakkaani qanoq amerlatigisunik misissuisoqarsimanersoq allattorsimavai. Tassa kisitsisit taakku takutinngilaat, kommunini pineqartuni innuttaasut qasserpiaat misissortissimanersut.

Nunatsinni Nakorsaanerup Henrik L. Hansenip Sermitsiaq.AG-mut ilisimatitsissutigaa, innuttaasut 100-nik sinnillit sineriammeersut, najugaqarfimminnut angerlarlutik aallartinnatik Nuummi misissortissimasut.

Ajunngitsumik pissuseqartartut

Nunatsinni nakorsaanerup maluginiarsimanngilaa, innuttaasut misissortinnissamut naaggaartarsimanersut. Aamma nunami tamarmi peqqinnissaqarfimmi sulisut misissugassanik tisusinissamik suliassaq pimoorullugu ingerlatsisut, Henrik L. Hansen ilisimatitsivoq.

Taamaakkaluartoq nunatsinni nakorsaanerup nunami tamarmi innuttaasunut kaammattuutigaa, covid-19-imik tunillatsissimanermut annikikkaluamilluunnit malugisaqaraanni misissortikkiartortarnissaq.

Powered by Labrador CMS