Misissuisoqarneratigut Norgemi nannut qanigisariippallaarlutik piaqqisartut paasineqarsimavoq
Immap sikuerukkiartornerata malitsigisaanik Svalbardimi nannut genimikkut assigiinngissuseqarunnaarsimasut, misissuisimanermi paasineqarsimavoq.
Svalbardimi nannut genimikkut assigiinngissuteqarnerisa 10 procentii ukiut 20-t ingerlaneranni allanngorsimapput.
Akerlianik nanoqatigiit assigiinngitsut genisa assigiinngissusaat 200 procentimik annerulersimapput. Norgemi misissuisimanerup, sapaatip akunnerani kingullermi ilisimatuussutsikkut atuagassiami The Royal Societymi saqqummiunneqartumi, tamanna takutippaa.
Taamatut ineriartortoqarneranu qularnanngitsumik pissutaavoq imaata sikuerukkiartornera, tamatumalu malitsigisaanik nannut ungasinnerusumut nuunnissamut periarfissaarukkiartorput, taamalu nannut qanigisariippallaarlutik piaqqiortalersimallutik.
Fernando Ugarte Pinngortitaleriffimmi nannut pillugit ilisimatusartuuvoq, Norgemiullu misissuisimanerat atuarsimavaa.
Qimusseriarsuarmi assigusumik inissisimasoqartoq
Taassuma misissuisimanermi paasisat imatut nassuiarpai, nannut ilaat ukioq naallugu qeqertat akornanniittarput, allalli imaata sikuani uumasuusarput ukiullu qeqertanukartarlutik:
- Silalli pissusaata allanngoriartorneratigut imaata sikuerukkiartornera pissutigalugu nannut imminnut attaveqartarunnaariartorput, taamalu immikkoorneruleriartorlutik, Fernando Ugarte oqarpoq.
Ilisimatusartup oqaatigaa, Qimusseriarsuarmi assigusumik inissisimasoqartoq:
- Kalaallit Nunaanni taamatorpiaq inissisimanngilagut, uppernarsaatissaqartipparpulli Qimusseriarsuarmi nannut mikinerusumi najugaqartartut, nannunullu eqqaamiuminnut atassuteqarunnaariartorlutik, Fernando Ugarte oqarpoq, nangillunilu:
Ugarte: Nannut nunarujussuarmi uumasuujunnaarsinnaapput
- Qimusseriarsuarmi nannut, Canadalu avitseqatigisartakkavut ukiut 30-t kingulliit ingerlaneranni aasakkut imaata sikoqartarunnaarnera misigisarsimavaat. Puisinniarnissamut periarfissaat ajornerulersimavoq, isorartoqisumi naluttariaqartalersimapput aamma 1990-ikkunnut sanilliullugu pisinnaasakinnerulersimallutillu ikinnerusunik piaqqisalersimapput, Fernando Ugarte oqarpoq.
Fernando Ugartep erseqqissaassutigaa, silap pissusaa allanngoriartormat, piffissaq ungasinnerusoq eqqarsaatigalugu nannut nungunnissamut ulorianartorsiortinneqartut:
- Gassit silaannarmik kissatitsisartut iliuuseqarfigineqanngippata, nannut ukiut hunnorujulikkuutaat maanna atuuttut ingerlaneranni Issittumi uumasuujunnaassapput, taanna oqarpoq.
Kalaallilli Nunaat sumiiffiit ilagivaat ukiuni aggersuni nannut pitsaasumik atugaqarfigisinnaasaat, taanna nassuiaavoq:
- Kalaallit Nunaat nannunut uumaffigissallugu pitsaasuuvoq, silap qanoq innissaanik siulittuutigineqartartut takutimmassuk, Avannaanni aasakkut immap sikoqartarnera kingulliulluni nungukkiartulissasoq. Taamaamma Avannaani nannut uumaannarnissamut periarfissagissaarnerupput.