Misissuisarfik utaqqisorpassuarnit unammillerneqartoq
Nuummi misissuisarfimmut misissortikkiartortut ulluni kingullerni amerlalluinnarput. Atuarfinni, meeqqerivinni inuiaqatigiinnilu tunillaassuunneq annertuvoq.
Inussivimmi arpanneq kiagunnerlu ulluinnarsiutaasaraluarput. Ullunili makkunani arpanneq tunuleriaalluni allorialaaginnartarnernik Inussivik misigisaqarfiuvoq. Misissortikkiartortummi hunnorujulikkuutaat akunnerpassuarni utaqqisariaqartarput.
Inussiviup silataani silap issinnerani utaqqisunit assit, attaveqatigiittarfikkut siammarterneqartaarput. Arlallillu suli misissortigatik angerlaannartariaqartarsimapput, misissuinissamut periarfissiineq killeqarmat.
Tunillatsissimasunut qanillisimasut tunillatsissimanermullu ersiuteqartut misissortinnissaat kaammattuutigineqartarpoq.
Tamannalu peqqinnissaqarfimmut unamminarluinnarpoq, nalinginnaasumimmi ullormut 300-t misissorneqartarput, tuniluuttoqarneranilu ullormut 900-t misissorneqartariaqartarput.
- Unammillernartut annersaraat misissortittariaqartut ullormut amerlalluinnartarmata. Misissuisarnerup eqaannerpaanissaa, amerlanerpaallu misissortinnissaat pillugu sulingasuarpugut. Kisiannili soorunami tuniluunnerup annertunerpaaffiani, misissugassallu 900-saqattaarneranni unammillerneqarujussuarpugut, Jesper Olesen, Peqqinnissaqarfiup immikkoortuani nakorsat pisortaq Sermitsiaq.AG-mut oqaluttuarpoq.
Sulisut coronamik aamma eqqorneqarput
Peqqinnissaqarfiup immikkoortuani nakorsat pisortaat nassuiaavoq coronamik tuniluuttoqarnerani peqqinnissaqarfimmi sulisut aamma eqqorneqartut. Tamannalu peqqinnissaqarfimmut aamma tatisitsigaatsiarpoq.
- Sulisoqarpugut atuarfinniittuutilinnik meeqqerivinniittuutilinnillu, taakkulu aamma coronamik tunillaaffiummata sulisugut angerlarsimaannarnissamik aamma eqqorneqartarput. Taamaattoqartillugu annertuumik unammillerneqartarpugut. Sulisulli naammatsinniarlugit ilungersorluta sulivugut, misissuinerillu ataasiakkaat sukkanerpaamik tiguneqartarnissaat sulissutigaarput amerlanerusut ullormut misissortissinnaaniassammata, Jesper Olesen oqaluttuarpoq.
Taanna nassuiaavoq tunillaassuunnerup annertulluarnerani ullualunni nalimmassartoqartariaqartartoq. Tuniluunnerullu sukariarnissaa naatsorsoruminaattarluni. Misissuisarfimmi nalunaarsuisut, misissugassanik tigooraasut allallu sulisut maanna 20-t missaanniipput.
Sulisut amerlanerusut
Innuttaasut arlallit apeqqusiipput illoqarfik taama angitigitillugu misissuisarfiit arlaliussannginnersut. Misissuisarfiilli amerlineqarpata sulisut agguataarneqartariaqalernissaat isumatusaarnerunngitsoq unammillernarnerussasorli, Jesper Olesen isumaqarpoq.
- Misissuiviit amerlanerulerpata tamanna isumaqassaaq sulisugut agguartariaqalissagigut. Maanna misissuiviup atuuttup annertunerulernissaa sulissutigaarput, sulisullu amerlanerusut atulernissaat. Oqarusuppunga nalimmassarneq ingerlatiinnaavipparput, pisariaqartitsineq aallaavigalugu, Jesper Olesen Sermitsiaq.AG-mut oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...