Misissuinerit: Qaqqaq annertooq sisuussappat ajunaarnersuaqartitsisinnaasoq

Karrat Kangerluani qaqqap sisoornerata kingunerisaanik ajornerpaamik pisoqassappat pereersumit marloriaammik sakkortunerussasoq naliliinerit kingulliit takutippaat.

Det Norske Geotekniske Institut Karrat Kangerluani qaqqap sisooriaannaap misissorneqarnerani akulerutsinneqarput. Misissuinermilu qaqqaq sisooriaannaq 3-mik kisitsisitalik sisuussappat tassaarsuaqarnermi nunat malissuarnit eqqorneqartussat annertunerussapput, qutsinnerusumullu mallit apuuttussaallutik.

Tassaarsuaq annertunerusoq

Karrat Kangerluani qaqqaq sisooriaannaq tamarmi sisuussappat tassaarsuaq marloriaatinngorluni annertunerussasoq misissuinerit takutippaat. Nunaqarfiit arlallit Uummannamilu umiarsualiviup eqqaa eqqorneqassapput.

Issittumi sakkutuut misissuinerat qaammataasiamiillu assit takutippaat qaqqap ilarujussua suli sukkasuumik nikikkiartortoq. Immikkulli ilisimasallit qaqqaq qanoq annertunerutigisumik nikittarnera takusinnaanngilaat.

Qaqqaq anginerujussuaq sisooriaannaasoq paasissutissat nutaat takutippaat. Ajornerpaamillu pisoqassappat mallit portunerusut najugaqarfinnut taamaalillutik apuussinnaallutik.

Piffissaq sivikippoq

Qaqqap sisoorneraniit tassaarsuaq qanoq sukkatigisumik Uummannap eqqaani nunaqarfinnut Uummannamullu eqquinissaa immikkut ilisimasallit misissorpaat. Piffissarlu navianartorsiorfimmi najugaqartunut qimagussornissamut apeqqutaanerpaavoq.

Qaqqap sisoorneraniit tassaarsuup najugaqarfinnut takkuteqqaarnissaanut piffissaliussat aajuku:

• Nuugaatsiaq: 7 minutsit
• Illorsuit: 13 minutsit
• Qaarsut: 26 minutsit
• Niaqornat: 23 minutsit
• Uummannaq: 30 minutsit
• Saattut: 35 minutsit
• Ukkusissat: 26 minutsit
• Ikerasak: 38 minutsit

Misissuinerup aamma takutippaa nukissiorfiit arfiniliusuni tallimat eqqorneqassasut, Uummannamilu napparsimmavik aamma tassaarsuarmit eqqugaassalluni.