Misissuineq: Nunatsinni meeqqat eksemilersartut amerlasut

Misissuinerup nutaap takutippaa Kalaallit Nunaanni meeqqat pingasuugaangata ataaseq eksemimik amerluuteqartartoq. Meeqqat nunap inoqqaavinit, Inunnit, kingoqqisut amerluummik eksemimik nappaateqalernissaminnut qaninnerusartut, misissuinerup takutippaa.

Kalaallit Nunaanni meeqqat pingasuugaangata meeraq ataaseq eksemeqartarpoq.

Nuummi, Sisimiuni Qaqortumilu meeqqerivinnit 34-neersunit meeqqat 0-7-inik ukiullit misissorneqarnerannit tamanna paasinarsivoq. Misissuineq 2019-2020-mi ingerlanneqarpoq. Nakorsap Anna Anderssonip meeqqat misissorsimavai, apeqqutillu akisassat atorlugit meeqqat pillugit paasissutissanik katersisimalluni.

Issittumi nunap inoqqaavinit, Inuit-nit kingoqqisut meeraat, akusaanerusunit qallunaalluunniit meeraannit, atopisk eksemimik amerluuteqarnissamut qaninnerusartut misissuinerup takutippaa.

Anna Andersson, Herlevimi aamma Gentofte Hospitalimi nakorsaq, Ilisimatusarfimmilu ph.d.-nngorniartoq oqaluttuarpoq misissuinerit takutikkaat meeqqat issittumi inuit-nit kingoqqisuusut amerluummik eksemimik nappaateqalernissaat ilimanaateqarluinnartoq takusinnaasimagitsik.

- Avatangiisit angajoqqaaniilluunniit timikkut kingornussat pissutaanersut ilisimarpianngilarput, meeqqalli DNA-vi pisagut atorlugit misissuinerit ingerlateqqissavagut, oqarpoq.

Misissuinermi amerluttarneq, nerisassanut sapigaqarneq, astmartuuneq siulluttarnerlu misissorneqarput.

Misissuinerup takutippaa:

  • 28 procentii misissortinnerminni atopisk eksemimik amerluuteqarput
  • 34,5 procentii misissortinneq sioqqullugu amerluuteqarnikuusimapput
  • 18 procentii astma/astmatisk bronkitis nappaatigaat
  • 13,5 procentii nerisassanik sapigaqarput
  • 36 procentii siullullutik aseruuttoortarsimapput

Danmarkimi ukioqatigiiaanni misissuiffigineqartuni atopisk eksemeqartartut 15-25 procentit missaanniipput, soorlu aamma 10-15 procentii astmaqartut 10 procentiisalu missaat nerisassanik sapigaqartut.

Eqqiluisaarpallaarneq amerlunnerulersitsisarpoq

Meeqqat qaffasissumik ilinniagalinnik anaanaqartut imaluunniit illuinnarni najugaqartut amerluummik eksemeqalernissaat aamma ilimanaateqarneruvoq.

Anna Andersson Sermitsiaq.AG-mut nassuiaavoq illuinnarmi najugaqartut aamma qaffasissumik ilinniagaqarsimasunik angajoqqaallit inuiaqatigiinni akissarsiagissaarnerusuni peroriartortuusinnaasut. Misissuinerit nunatsinni ingerlanneqarsimasut siulii takutippaat meeqqat aningaasarsiagissaarnerusuni peroriartortut amerluuteqalernissamut qaninnerusartut. Inooriaaserli allatigulluunniit aarlerinaateqarneruneq sumit peqquteqarnersoq ilisimaneqanngilaq.

- Eqqoriaanerit ilagaat ilaqutariit aningaasarsiagissaarnerusut aamma eqqiluisaarnerusarnerat. Anaanaasup meeqqallu amiat ipiippallaartillugu meeqqap amiata illersornissaa annikinnerulersinnaasarpoq. Meeqqallu timaata illersuutaa kingusinnerusukkut ippinnaateqartumik qisuariartalersarluni. Taamaattoqartillugu atopisk eksemeqarneq, polleninik sapigaqarneq astmaqarnerlu takussutissaasareerput, nassuiaavoq.

Pinaveersaartitsineq

Misissuinerit inernerisa ammip paarinerunissaanut iliuusissat, orsoqarluartumillu crememik ammip tanittarnissaata pisariaqassusaa takutippaa. Pinaveersaartitsinissamut siunnersuutit taama ittut peqqinnissaqarfiup ukiuni kingullerni ukkatarai.

Anna Anderssonip erseqqissaatigaa misissuinerit illoqarfinni pingasuni ingerlanneqarsimammata, illoqarfinni nunaqarfinnilu allani meeqqat akornanni amerluuteqarnerup atugaanera qanoq innersoq nalilerneqarsinnaanngikkallartoq.

Misissuiartornissaq kingulleq ukiamut pissaaq, misissuiartortut Tasiilaliassallutik. Misissuiartornermi peqataalluartoqarumaartoq ilisimatusartut neriuutigaat.

Powered by Labrador CMS