Misissuineq: Isumaginninnermi siunnersortit 155-it amigaatigineqarput
Naalakkersuisut nunatsinni inunnik isumaginninnermi siunnersortit ilinniarsimasut peqatigiiffialu (NIISIP) kommunini inunnik isumaginninnermi siunnersortit amigaataanerat pillugit aaqqiissuteqarniarlutik oqaloqatigiipput. Peqatigiiffiup misissuinerani erserpoq nunatsinni isumaginninnermi siunnersortut ilinniarsimasut 155-it amigaataasut.
Suliat ikiliartunngitsut utaqqinerillu sivisuut innuttaasut politikkerigullu qangali tamanna ilisimavaat. Avannaata Kommuniani inunnik isumaginnittut atorfinni 51-iusuni taamaallaat sisamat atorfeqartinneqartut, NIISIP misissuinerata takutippaa.
Ilinniarsimasunik inunnik isumaginnittussaaleqineq Avannaata Kommuniani kisiat ajornartorsiutaanngilaq.
Qeqqata Kommuniani atorfiit 38-iusuni inunnik isumaginnittut arfineq-pingasut taamaallaat atorfeqartinneqarput. Kommune Kujallermi qulingiluat atorfinni 39-iusuni. Kommune Qeqertalimmilu (Aasiaat, Qasigiannguit Kangaatsiamilu) ilinniarsimasut tallimaapput atorfinni 30-iusuni.
Inunnik isumaginnittut Kommuneqarfik Sermersuumi amerlanerpaapput. Tassanimi inunnik isumaginnittut katillugit 51-iupput, atorfinni 73-iusuni.
Misissuinermi peqatigiiffik Qeqertarsuarmiit, Tasiilamiit, Paamiuniit Ittoqqortoormiiniillu akissutissarsinngilaq.
Ajornartorsiut pillugu NIISIP Naalakkersuisullu ataatsimeeqatigiipput. Inunnik isumaginnittut kommunini sulisut amerlanernut kajungernartuulernissaa maanna Naalakkersuisut sulissutiginialerpaat.
- Innuttaasoq oqartussaniit ikiorneqartariaqaleraangami ilinniarsimasumik sullinneqarsinnaanissaa pisariaqarpoq. Tamannalu anguneqarsinnaavoq inunnik isumaginninnermi siunnersortitut ilinniarsimasumik sullinneqarnermi, taama Isumaginninnermut, Sulisoqarnermut, Nunamullu Namminermut Naalakkersuisoq Mimi Karlsen oqarpoq.
Kommunit peqataatinneqassapput
Kommunini tallimaasuni inunnik isumaginninnermi siunnersortitut ilinniarsimasut katillugit 77-iupput atorfinni 231-iusuni. Taamaammat kommunini inunnik isumaginnittut katillugit 155-it amigaatigineqarlutik.
Inunnik isumaginninnermi siunnersortitut ilinniarsimasut sooq kommunip ingerlatsiviini atorfeqarusunneq ajortut misissorneqarnissaa NIISIP Naalakkersuisunut ilaatigut kajumissaarutigaa. Taassuma saniatigut amerlanerit atorfeqalerusulernissaat anguniarneqarnissaa noqqaasutigalugu. Meeqqanut, inuusuttunut ilaqutariinullu Naalakkersuisup amerlanerit inunnik isumaginninnermi suliaqalerusulernissaat sulissutiginiarpaa.
- Inunnik isumaginninnermi siunnersortitut ilinniarneq kajungernartuusaaq kommuninilu inunnik isumaginninnermi siunnersortaaneq aamma kajungernartuusariaqarpoq. Soorlu amerlasuut sulinermi kiserliorneq misigisinnaasarpaat, teamsilu atorlugu aaqqissuusinermi sulinermi pissutsit pitsanngorsaneqarsinnaallutik, Meeqqaanut Inuusuttut ilaqutariinullu Naalakkersuisoq, Paneeraq Olsen oqarpoq.
Inunnik isumaginninnermi siunnersortitut ilinniarsimasut peqatigiiffiat naammasserlaat suliffinni ilinniartinneqarluartarnissaat suleqatinullu avitseqateqartarnissaat kissaatigaat. Taassuma saniatigut isumaqatigiisutit suliffimmilu pissutsit pitsaangorsarneqarnissaat noqqaasutigaat.