Misissuineq: Innuttaasut illoqarfiit avataaniittut Tilioq saaffiginerusalerpaat

Innuttaasut amerlanerusut innarluutillit illersuisoqarfianut Tiliumut ilisimasaqartut, saaffiginninnerinik misissuinerup ersersippaa.

- Nunaqarfinnit tunumiillu saaffiginnissutit amerliartornerat tassunga aamma takussutissaavoq. Misissueqqissaarneruttaaq takutippaa Tiliup inunnit innarluutilinnit tusaamaneqarnera aamma/imaluunniit tatigineqarnera annertunerulersimasoq, tassami saaffiginnittartut amerlanersaat inunnit innarluutilinnit pisarmat ilaqutaasunit imaluunniit suliassamut immikkut ilinniarsimasunit pinnani, Tilioq naliliinermini allappoq, taanna ullumi saqqummersinneqarpoq.

Inut katillugit 249-t Tiliumut 2020-mi saaffiginnipput. 2018-imut 144-nik saaffiginnittunut sanilliullugu marloriaatingajammik amerleriarput.

Qulerarterutaat nunaqarfimmeerput isorliunerusuniilluunniit
Tiliup innuttaasut 2020-mi saaffiginninneri misissorpai saaffiginnissutit suuneri paasiniarlugit, suminngaanniillu saaffiginninnersut.

Nunaqarfimmi innuttaasut aamma illoqarfinnit minnerusuneersut ukiut marluk matuma siornamut sanilliullugu maanna Tiliumut saaffiginninnerusalertut, misissuinerup takutippaa.

- Tiliumut saaffiginnissutit inunnit illoqarfiit avataanni najugalinneersut 2020-mi amerlatsipput.

2017-19-mi inunnit illoqarfiit avataanneersunit saaffiginnissutit taamaallaat 5 procentit ataatilaarlugit amerlatigipput, 2020-milu illoqarfiit avataaneersunit inunnit saaffiginnissutit 9 procentinngorlutik amerlatsipput. Naatsorsueqqissaartarfimmi kisitsisit naapertorlugit 2020-mi innuttaasut 13 procentii illoqarfiit avataanni najugaqarput. Saaffiginnissutillu tunumeersut amerliallalaarput, saaffiginnissutit 2017-19-mi ikittuararsuusimagamik. 2020-mi Tilioq nuna tamakkerlugu ilisimaneqarnerulersimasoq pissutsit taakku marluk takutippaat, Tilioq ilisimatitsivoq.

Oqarasuaat sianertuarpoq
Innuttaasut Tiliumut saaffiginninniaraangamik sianertarput. Tassami inuit ajornartorsiutitik pillugi siunnersorneqarniaraangamik imaluunniit ilitsersuunneqarniaraangamik, saaffiginnittut pingasuugaangata ataaseq Tiliumut sianertartoq, misissuinerup takutippaa.

Pingajorarterutinit ikinnerulaartut Tiliumi sulisunik oqaloqateqarniaraangamik takkullutik saaffiginnittarput.

Misissuinerulli takutippaa, 2020-mi allakkatigut saaffiginnissutit amerlerialaarsimasut, saaffiginninnerit mailikkut imaluunniit nittartakkakkut imaluunniit Facebookikkut allannikkut pisarlutik.

- Tassunga pissutaasut ilagaat COVID-19 pissutaalluni 2020-mi upernaakkut Tiliumut ornigulluni saaffiginnittoqarsinnaajunnaarnera.

2020-mi saaffiginnissutit amerlanerpaartaat Avannaata Kommunianeerput. Kisianni Tiliup Qaanaamut nunaqarfiinullu maajip aallartinnerani paasititsiniaalluni angalaneranik tamanna pissuteqarpoq, tassani avannaani innuttaasut nammineq saaffiginninnissamut periarfissaqarluarput.

- Tiliup najuuttarnera innuttaasut iluarisaraat innuttaasunullu ornikkuminarnerulersitsisoq ersarippoq.