Skip to main content

Misissuineq: AK-p ilaasortat quliugaangata ataaseq killissamik qaangiiffigitittartoq

AK-p ilaasortani kissaatiginngisamik atoqatigiinniarpalaartumik qaninniarfigitinneq pillugu paasiniaaffigimmagit, akissuteqartut 10 procentii taama misigisaqarsimallutik ilisimatitsipput.

Atorfillit Kattuffianni ilaasortat 1300-t akornanni 439-t AK-p kissaatiginngisamik atoqatigiinniarpalaartumik qaninniarfigitinneq pillugu apeqqutinut immersuiffissamik pigamik akisimapput. Tassa ilaasortat 33 procentii peqataasimapput.

Akissuteqartuni 439-ni 10 procentit sulitillutik kissaatiginngisamik atoqatigiinniarpalaartumik qaninniarfigitinnermik misigisaqarsimasut, Atorfillit Kattuffiata misissuinermini paasivaa.

AK tusagassiorfinnut nalunaarummini ilisimatitsivoq kinguuaassiuutitigut kissaatiginngisamik qaninnniarneqarsimanermut apeqqummut angertut ilaatigut atoqatigiittarnermut tunngasunik apersortinnermik, pinnguaatinik tiinganermut atortunik tuniniaaffigitinnermik, atoqatigiinnermut tunngasunik oqaluttuutsinnermik, timi pillugu oqaasertalersuiffigitinnermik imaluunniit atoqatigiinnissamut kaammattortinnermik misigisaqartarsimasut.

Pineqartoq arnanik atisaqanngingajattunik mobiliminiit assinik takutitsisarpoq, suleqatinilu assinik paarlaaqatigiittarlutik. Pineqartoq instagrammimi facebookimilu assinik nassaarisaminik takutitsisarpoq, uffa nammineerluni attaveqaatini taakkunani profileqarani, ilaasortaq allappoq.

AK ilanngullugu ilisimatitsivoq pingasut pinngitsaaliniarneqarlutik atoqatiginiarneqarsimanermut tunngatillugu apeqqummut angersimasut.

- Apersortittut qulit akornanni ataatsip kanngutsaatsuliorfigineqarnera, 9 procentiisalu timikkut qaninniarneqarsimanerata, takutippaa qanoq ajornartorsiut annertutiginersoq, AK-p siulittaasua, Dina Olsen, oqarpoq.

Suleqatit, pisortat sullitallu

AK-mi ilaasortat kissaatiginngisamik atoqatigiinniarpalaartumik qaninniarfigitinnermik misigisaqaraangamik imaanngilaq suleqatit kisimik qaninniartuusartut. Amerlanerpaartaasali misigisarpaat suleqat killissamik qaangiisoq, misissuinerup takutippaa.

Kissaatiginngisamik atoqatigiinniarpalaartumik qaninniarfitittut:

  • 30 procentii suleqatiminnit killissamik qaangiiffigitissimapput
  • 6 procentii pisortamit killissamik qaangiiffigitissimapput
  • 7 procentit sullitamit taama pineqarsimallutik
  • 2,5 procentit innuttaasunit allanit
  • Kiisalu 4 procentii suliffeqarfiup avataanit suleqatigisaanneersumit killissamik qaangiiffigitissimallutik

Pinaveersaartitsineq aqqutissaassaaq

Killissamik qaangiiffigitissimasut 44 procentiisa angummit killissamik qaangiiffigitissimaneq misigisarpaat, 9 procentiisa arnamit taama pineqarneq misigisarlugu, sinnerisali ilisimatitsissutigerusussimanngilaaq killissamik qaangiisoq qanoq suiaassuseqarnersoq.

- Misissuinerup takutippaa sulisitsisut uagullu kattuffittut, atorfilinnik aqqutissiuinermi pikkorinnerusariaqartugut, qanoq kannguttaatsuliornerit suliarineqarnissaannut, aammalu qanoq pinngitsoortinneqarsinnaanerannnut, Dina Olsen oqarpoq.

Nalikkaakkut attortippunga, suleqatima inimiinnginnerani, ilaasortaq misissuinermut tunngatillugu nassuiaateqarluni allappoq.

- Piffissami aggersumi misissuinermi akissutit sukumiinerusumik misissussavagut, sulisitsisunut ilaasortanullu ajornartorsiummik qaangiinissamut iliuusissamik innersuussilluta. Kikkut tamarmik akisussaaffimmik tiguseqataasariaqarput, siulittaasoq oqarpoq.

Misissuinissamut atortut Atorfillit Kaffuffiata atorsimasai, Inuit Pisinnaatitaaffiinut Instituttip sananikuuai.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER