Misissuineq: 3. klassemi atuartut arfiniliugaangata ataaseq atuarniarnermik ajornartorsiuteqartarpoq

Ilinniartitaanermut aqutsisoqarfik atuartut atuarniarnermik ajornartorsiuteqarnersut misissornissaannut kalaallisut misiliutinik suliaqarsimavoq. Misissuinermi atuartut ilinniarnissamut ajornartorsiuteqarsinnaasut ilinniartitsisunit takujuminarnerulersinnaapput.

Atuartut oqaatsinik ilikkarsinnaanerannut ajornartorsiuteqarnersut paasiniarlugit misiliutit kalaallisoortut siulliit atorsinnaalingajalerput.

Misiliutit atorlugit meeqqat atuarfiini nukarlerni ukioqatigiiaat marluk misissuinermi ilaasimapput. Misissuinerup takutippaa 3. klassemi atuartut arfiniliuppata ataaseq atuarniarnermik allanniarnermillu peqatiminit ajornartorsiuteqarnerusinnaasarput. Atuartut misiliummik kalaallisut ingerlanneqartumik misilitsinneqarsimapput.

Nalunaarusiap "Kalaallit Nunaanni atuartunut naqinnernik ilisarsisinnaanngitsunut suliniut" atuartut allattaatsimik ajornartorsiornerpaat qanoq nassaarinissaannut killiliussinissamut siunnersuuteqarpoq, killiliussallu taassuma atuartut taakku 1. aamma 2. klassimili misilinnerisa inerneri aallaavigalugit qularnaatsumik nassaarereersinnaaneri takutissinnaavai.

Misissuinermi atuartut 500-t missaat ukioqatigiiaannit marlunneersut, 2015-2020-p akornanni malinnaavigineqarsimapput.

Nukappiaqqat amerlanerusut

3. klassemi atuartuni 203-ni peqataasuni, atuartut 34-it atuarniarnermik allattaatsimillu ajornartorsiuteqarput. Taakkunannga 65 procentii nukappiaraapput, 35 procentiilu niviarsiaraallutik.

Killiffissiuineq ima paasineqassanngilaq atuarnermik allattaatsimillu ajornartorsiuteqartut naqinnernik ilisarinnissinnaanngitsuusut.

- Misissuinermi aalajangersimasumik oqaatigineqarsinnaanngilaq atuartut atuarsinnaanermikkut allassinnaanermikkullu ajornartorsiuteqarnerpaat tassaasut naqinnernik ilisarsisinnaanngitsut. Misissuinerulli takutippaa, atuartut amerlasuut eqimattani misiligutini appasissumik angusallit, tassaasut aamma ataasiakkaani misiligutini nipituumik oqaasiusanik atuarnermi appasissumik angusallit. Tamanna naqinnernik katiteriniarnermik ajornartorsiuteqarnermik - immaqa naqinnernik ilisarsisinnaanngitsuuneq.

Killiffissiuineq ikiuutillu neqeroorutaapput

Atuartut pisinnaasaannik killiffissiuinissamut misiliutit nalunaarusiarlu atuarfeqarginnut, kommuninut susassaqartunullu nassiussuunneqarput.

Ilinniartitaanermut aqutsisoqarfimmi naqinnernik ilisarsisinaanngitsut pillugit atuarfinnut siunnersorti, Karina Meincke neriuppoq killiffissiuinermut misiliutit atorluarneqassasut:

- Misiliutitut suliaqarsimanerinnarmi takusinnaalereerparput ilinniartitsisut arlallit atuartut atuarnermi ilikkarniarnerminni pisariaqartitaannik takunnissinnaanerulertut. Taamaasilluni atuartunut siusinaartumik iliuuseqartoqarsinnaavoq, Karina Meincke Sermitsiaq.AG-mut oqarpoq.

Naalakkersuisoq isumalluarpoq

Naqinnernik ilisarsisinnaannginnermut misiliutinik nunatsinnut oqaatsitsinnullu tulluarsakkanik peqannginnera sammivinnit assigiinngitsunit isornartorsiorneqartarsimavoq.

Killiffissiuinerlu naqinnernik ilisarsisinnaannginnermut misiliutinut sanillersuunneqarsinnaanngikkaluartoq, taamaattoq Ilinniartitaanermut Naalakkersuisoq isumalluarpoq atuartut atuarniarnermik ajornartorsiuteqartut ikiugasuarneqartarnissaanut periuseqartoqarsinnaalermat.

- Nuannaarutigaara suliaq annertooq inuiaqatigiinnilu pisariaqartinneqaqisoq manna naammassilluni saqqummermat. Atuarsinnaaneq inuup inuiaqatigiinni inooqataanermini sakkussaasa annerpaartaraat, taamaattumik Naalakkersuisuni tamassuma nukittorsarneqartuarnissaa politikkikkut anguniagariuarparput. Kikkulluunniit ikiorserneqarnissaminnut pisinnaatitaaffeqarput, pitsaanerpaavorlu siusissukkut iliuuseqarnissaq, Ilinniartitaanermut Naalakkersuisoq Katti Frederiksen oqarpoq.

Ilinniartitaanermut aqutsisoqarfiup erseqqissarpaa killiffissiulluni misiliut meeqqat atuarfiini nukarlerni ilinniartitsisunut atugassatut neqeroorutaasoq. Misiliinerilli kingunerini atuartut siusinaartumik iliuuseqarfiginissamik pisariaqartitsisut iliuuseqarfiginissaanut alloriarnissat pillugit aqqutissiuussisoqartarumaartoq, misiliutit atorneqarsimatillugit.

Powered by Labrador CMS